候任立法會議員朱凱迪收到「死亡威嚇」，連日嚟各界人士都出嚟為佢發聲，政府、警方都高度重視事件。噚日有基督教團體發起集會聲援朱凱迪，唔少政界、宗教界以至社福界等人士都出嚟聲援，朱凱迪作為事件主角當然有出現啦，除咗佢手舉「唔好用螢光捧」玩具咪牌嘅環保宣傳夠gimmick之外，囍雨留意到佢嘅一番言行，其實非常值得從政者深思。

根據朱凱迪嘅引述，佢自己同特首梁振英喺電話對話咗七分鐘，對話氣氛輕鬆，大部分時間都係朱凱迪講嘢多，包括反映唔同嘅訴求，又話特首唔係剩係打去問下佢點就收線咁簡單，而係願意聽下佢有咩訴求，佢自己對於特首梁振英願意同佢進入討論表示高興，仲話希望可以繼續同特首進入對話。

問題又嚟喇，一段咁普通嘅對話，有咩咁值得從政者深思呢？囍雨想講，如果大家有留意近期有關非建制派候任立法會議員嘅相關新聞，無論係本土派、自決派等等，唔少都話自己唔會同特首等會面，有啲直頭話預咗喺議會有肢體衝撞，朱凱迪呢個咁「普通」嘅回應，正正係話畀其他從政者聽，搞政治運動，唔溝通、唔對話，試問又點會落實到政綱、爭取到成果。

囍雨相信各個候選人喺選舉嘅時候都會有唔同嘅政綱，嚴格嚟講可以話係對選民嘅承諾，話畀選民聽佢哋入咗議會之後會做啲咩、爭取咩；大家諗下，如果呢班非建制派議員入到議會得個鬧字，齋砌又唔傾，咁最後可以爭取到啲咩呢？

原圖：stheadline