周永勤在誤導誰?
周永勤在誤導誰?

放棄立法會新界西選舉嘅自由黨周永勤,噚日返香港召開記者會,交代「被迫」棄選嘅詳情,話自己畀自稱「北京落嚟」嘅陌生人威脅退選,仲話如果周永勤唔聽話,就會對佢身邊人「採取行動」。先唔討論周永勤係咪可信,正如囍雨之前文章所講,周永勤棄選果時有意無意將事件牽扯到何君堯身上,對成個選舉都好唔公平,結果真係講中,噚日仲承認件事同何君堯無關,退選唔關何君堯義工條錄音事。既然係咁,點解唔一早澄清嘅?
 
選舉前語意曖昧 選後先幫人澄清?
 
冇屈佢架,喺噚日嘅記者會,周永勤依然冇正面回應退選關何君堯乜事,只係叫人諗下如果自己繼續選邊個會有風險落選,只係重申唔係因為何君堯義工要「狙擊」佢而退選。嗱,問題嚟喇,既然唔關何君堯或者何君堯義工嘅事,周永勤棄選果時攞何君堯義工嘅錄音出嚟係咩意思呢?講得咁曖昧,係咪刻意想將矛頭轉向無威嚇過佢嘅何君堯身上?咁做係咪誤導緊傳媒同選民呢?
 
姑勿論周永勤係咪真係畀人恐嚇,咁樣「暗屈」其他候選人,本身已經極冇民主精神。所有嘢都塵埃落定先澄清唔關其他候選人事,真係有違從政者應有嘅道德。至於佢係咪被威嚇,囍雨真係無從判斷,周永勤喺記者會過程無提及任何人名,又話已經去咗廉政公署助查,咁就唯有等執法部門去查囉!

曾鈺成:為何要花那麼大力氣在「接近零支持度」的候選人身上
 
周永勤講到言之鑿鑿,就算無講人名都應該先相信佢講嘅說話,不過除咗囍雨外,立法會主席曾鈺成都覺得好奇怪,認為周永勤係一個「接近零支持度」嘅候選人,要求佢棄選嘅「邏輯喺邊度」,而且無必要花咁大力氣喺一個「幾乎無票嘅人身上」。

計囍雨話,如果周永勤真係受到威嚇而又被嚇到,點解仲會出嚟講咁多嘢?正路唔係應該「封晒口」「保護」身邊人同朋友先啱咩?大家試下放低成見諗清楚,周永勤而家咁「退選」,實際作用喺邊度?記住話,係高調話畀人恐嚇而退選喎,乜真係會益咗何君堯咩?

再講,就當真係有人威嚇周永勤,仲講到會威脅佢身邊人安全;周永勤最後用咗比「留低」更壞事嘅「高調退選」,乜威嚇佢嘅人會收貨咩?周永勤嘅反應同行為,根本唔係正常受威脅嘅人會做嘅!周永勤,你唔好當全部香港人係低能先得架!
 
原圖:周永勤Facebook

評論