新一屆立法會選舉結果塵埃落定，有人歡笑有人愁，每逢有連任議員高票落選，都一定會引來陣陣係咪畀人鎅票「鎅到輸」嘅討論。就今屆嚟講，討論得比較興起嘅，就梗係新界東嘅范國威啦，佢雖然攞到比上屆高嘅31,595票，但最終都唔能夠成功連任，喺9月4日投票日，佢更加話自己同「師父」鄭家富票源重疊，又批評鄭家富違背承諾，搵佢新民主同盟嘅樁腳助選，仲講到自己一度哽咽，話畀人喺「背後插刀」添，事件真係「撲朔迷離」。

當年范國威靠鄭家富支持 是誰鎅誰票？

囍雨一向鍾意擺事實、講道理，唔會聽完一邊講嘢就信嘅，對於范國威呢個case，囍雨唔認為係范國威畀鄭家富鎅票囉！點解咁講，第一，選舉就係選民可以投票畀心儀嘅候選人，幾時話啲票一定係屬於邊個，其他人唔可以攞架，泛民成日話選民有自由意志，身為民主派，輸咗話人鎅票非常可恥。第二，大家唔好忘記，點解2012年嘅時候寂寂無名嘅范國威會當選，當年除咗佢自己sell本土嘅形象得到部分選民支持，佢贏到新界東尾席唔多唔少都係靠鄭家富幫佢；如果佢話畀鄭家富鎅票，不如話鄭家富自己行番出嚟，攞番本來支持佢嘅新界東選票！

鄭家富有重量級人物支持 背後唔係咁簡單？

再講，有啲傳聞講到鄭家富係因為種種原因突然出嚟選，講到繪形繪聲，更甚嘅係描繪到鄭家富好似係阿爺搵出嚟咁。Again，囍雨亦都係非常唔同意呢啲講法，退一萬步講，如果鎅票嘅講法成立，而又真係有人搵鄭家富出嚟鎅范國威票，邊個涉嫌最大呢？答案係，囍雨都唔知！不過囍雨作為一個選民，曾經收到鄭家富嘅選舉宣傳電郵，入面見到榮休主教陳日君樞機幫鄭家富宣傳喎，如果連陳日君都出動幫鄭家富，咁鄭家富背後有咩人支持呢？我哋唔肯定，不過陳日君連同某三名泛民重量級人物被喻為「搞事四人幫」，囍雨斷估都唔會係阿爺搵陳日君幫手呀？

至於其他立法會候選人，例如工黨李卓人、民協馮檢基同工黨何秀蘭等等，囍雨都唔同意佢哋鎅人票或者畀人鎅票嘅講法，例如工黨入面有張超雄繼續當選，馮檢基參選嘅新界西亦有郭家麒、尹兆堅呢啲溫和泛民當選，到底係畀人鎅票，定係自己議會、社區工作做得唔夠好，就留畀市民做判斷喇。呀 … 差啲唔記得講，今屆自由黨李梓敬、田北俊團隊喺新界東都落敗，點解？囍雨認為原因都係好簡單，係過唔到票畀新人，定係自己喺議會、社區少做實事，選民會懂的。

原圖：std.stheadline