立法會選舉投票在即，各大網媒傳媒，都因應自身立場推薦不同嘅候選人。老老實實，有立場冇所謂，亦一啲都唔出奇，但如果為咗令到自己唔喜歡候選人，而不惜走去抹黑、潑污水，甚至鋌而走險連有可能犯法事都去做埋，咁就真係唔要得喇。講緊邊個？就係近日都好HIT、深受激進網民愛戴嘅「毛記電視」之嘛！

涉嫌違法的毛記電視

話說「毛記電視」昨日傍晚突然發一段短片，片裡面好出名嗰個「東方昇」呢，走去扮超級區議會候選人周浩鼎嘅助選團成員，喺街上面周圍同人講，話周浩鼎喺區議會選舉選情樂觀，大家唔使再投票畀周浩鼎喇。

區議會選舉？唔係舊年完咗喇咩？做乜喺立法會選舉前夕播出呀？囍雨唔敢揣測呀，相信係有人以為好醒，咁樣就可以規避法例限制啩！不過又咁，片段裡面係有提及9月4號，即係嚟緊立法會選舉嘅投票日；如果「毛記電視」真心以為咁樣就吹佢唔脹，只可以衷心講句：「Too Simple, Sometimes Naive」。

犯咗邊條法例

講咁耐？到底「毛記電視」涉嫌違反邊條法例先？其實，《選舉（舞弊及非法行為）條例》第二十六條早就規定，候選人或任何人為促使或阻礙某候選人或某些候選人當選，而發布有關該候選人或該些候選人的虛假或具誤導性達關鍵程度的事實陳述，即屬違法。

失實陳述？有冇咁嚴重呀？當然嚴重啦，「東方昇」喺條片裡面戴晒周浩鼎彩帶、周圍同市民握手，最重要係條片有上網，影響力有幾大，真係無從估計。

外人點睇，囍雨就清楚喇，但周浩鼎同佢團隊就認為短片具誤導性，昨晚已經去咗ICAC投訴，同時要求「毛記電視」移除短片。「毛記電視」今次都算聽話，夜晚十點幾已經自動刪片，不過就繼續「死雞撐飯蓋」，話唔想畀周活鼎有機會大做文章博同情，所以將段短片刪咗喎。

希望ICAC繼續查

即係咁，做錯嘢好應該認錯，狡辯係唔會令你型咗囉。不過是旦啦，既然「毛記電視」已經認衰刪片，囍雨都無謂再講咁多，只係希望ICAC可以繼續調查，睇吓有冇人犯法都好吖。

「毛記電視」條片就話，喺今次區議會（第二）功能界別選舉中抽到編號809嘅周浩鼎「選情唔急」，但周浩鼎就話自己好急，到底市民應該信邊個好呢？信邊個呢，大家就自己決定啦，囍雨唯一可以講嘅係民調結果。周浩鼎喺各大民調長期徘徊喺「當選」同「落選」之間，點睇都冇理由「唔急」啩！嗱，唔肯定架，睇數字咋。

點都好，希望今日到選舉之前都唔好再咁多風風雨雨同抹黑手段，9月4號，全香港合資格選民齊齊選出真正可以代表自己嘅議會代表啦。

注：區議會（第二）功能界別選舉候選名單：

涂謹申團隊、李慧琼團隊、鄺俊宇團隊、何啟明團隊、陳琬琛團隊、王國興團隊、關永業團隊、梁耀忠團隊及809號的周浩鼎團隊。

圖片來源：makya、tvmost