今日係香港中、小學開學日，喺啱啱過去嘅暑假，涉及中小學界而又嘈得最勁嘅，肯定係校園內應唔應該討論「偽本土、真港獨」。今朝起身即時碌吓Facebook，不出所料，果然有關於學生喺校園外圍派發所謂「本土」思想單張嘅新聞；囍雨思考咗好耐，到底作為家長、老師，大家應該點看待呢類行為？點樣先可以確保學生福祉不受損害？

禁不了學生討論

先旨聲明，囍雨「反港獨」、唔希望國家分裂嘅立場十分明確，但同時好明白，所謂「本土、港獨」嘅思潮，喺家陣年輕人裡面勁盛行，愈唔畀佢哋講，佢哋就愈會講，禁都禁唔住。

正如特首梁振英所講，「港獨」的確冇乜討論空間，一樣喺「法律、政治、實際同可行性」上都冇可能實踐到嘅「政治主張」，除咗「失敗」，根本唔會有其他結論。家陣問題只係，若果學生係都要喺學校討論「港獨」或者派發宣傳單張，咁又如何處理。

校園不涉政治 校方應「一視同仁」

其實唔理「本土」又好、「港獨」又好，講穿咗都係政治主張。學校處理方法其實好簡單，如果認同「政治不應入侵校園」，咁「偽本土、真港獨」亦唔應該有優惠！唔准民主派入校、唔准建制派入校，自然唔應該容許本土派入侵學校。

咁如果學生想喺校園討論「港獨」又點先？正如上面所講，現實上係禁唔到，班學生係要講，學校最多唔借出場地啫，唔通可以罰留堂、罰抄《基本法》，或者趕佢哋出校？唔可能囉，因為教育唔應該係咁。

老師／家長灌輸正確訊息

如果囍雨係老師／家長的話，其實好簡單，班學生要傾，好，我就同你傾，講出事實嘅全部，包括：1) 基本法不容許、2) 絕大部份華人血統嘅香港人，都係中國人，呢類人佔咗香港超過九成人口、3) 香港由此至終都係屬於中國嘅一部份、4) 香港冇天然資源，冇條件獨立、5) 喺香港搞「港獨」，最終必定涉「暴力」同「流血」。

囍雨始終相信，絕大部份香港學生都係理智同講道理嘅，擺事實、講道理，佢哋會肯聽。今日香港最大問題唔係「學生」，而係一班主張「偽本土、真港獨」嘅政棍，不斷美化「港獨」，唔提歷史、唔提後果、唔提暴力、唔提流血，只係一面倒將自己勾劃嘅「偽圖像」灌輸畀年輕人。

作為成年人／老師／家長都要對後生嘅有信心，只要有足夠正確資訊，香港學生個個都係叻仔叻女，一定識得明辨是非！

圖片來源：NOW新聞台截圖