港獨議題餘波不斷，特首梁振英都就有回應，講到明港獨唔係言論自由問題，是非黑白分明，校長、教師都應該喺同學面前擺出立場。現時坊間、尤其係親泛民嘅教師組織教協，仍然不斷高舉「言論自由」、「獨立思考」嘅旗幟，表明反對教師唔能夠參與討論嘅說法。囍雨認為，喺大家「堅守」言論自由之時，其實好應該諗清楚港獨係咩一回事。   講起港獨，如果大家有留意教協嘅說法，會發現佢哋由頭到尾講嘅，都係話應該畀學生「講」港獨，而唔係「搞」港獨。先唔同教協討論個「講」字係咩意思，囍雨喺度好想嚴正指出一個現實：喺香港「搞」港獨，必定涉及違法行為、流血及暴力，有咗呢個前設，討論先有意思。喺呢個前提下，如果教協認為應該畀學生討論港獨，繼而決定係咪支持港獨的話，咁問題就大喇，需知道而家啲學生組織係講到明要「搞」港獨，絕對唔係「和理非」討論，大家仲記得之前有人整炸彈、掟磚頭、縱火同襲擊警察嘛？   從關心學生嘅角度出發，教師應該任由學生「講」繼而「搞」，定係闡明立場勸止佢哋，答案其實好簡單，亦好清晰。   至於坊間近日不斷討論嘅《香港教育專業守則》，一啲有泛民背景嘅教師代表不斷重複教師要「保持客觀」、「鼓勵學生獨立思考」云云，但呢班教師有冇睇清楚，其實《守則》都有寫明教師要「尊重法律及社會接受的行為準則」，而且應「關心學的安全」。成日攞《守則》出嚟講，但啱用嘅先引用，唔符合「反政府」立場嘅重要內容就隻字不提，呢班泛民教師有何用心呢？   在情在理，教師唔係唔可以同學生討論問題，而係教師應該勸導學生唔好誤墮法網；如果有一日學生因為暴力抗爭而被捕，教師又於心何忍！   原圖：hket