特首梁振英日前發表網誌，題為「扶貧安老 共享繁榮」，內容講述特區政府近年扶助弱勢嘅社福政策，以及綜援個案下降等數據。網誌發佈之後，有媒體隨即話政府「吹」政績；係唔係「吹」呢，應該以事實為依據嘅，今屆政府扶貧工作範圍好闊，除咗幫綜援、公屋戶，就連「非傳統」嘅貧窮戶都有支援，效果仲相當唔錯添。   在職、兒童及老人貧窮問題亦須處理   大家可能會覺得住公屋、拎綜援嘅人就係貧窮，但其實貧窮嘅種類絕對唔止得一兩種，無錢、無工要拎綜援、住公屋，故然係貧窮嘅一種，但係有工作、無住公屋嘅人，一樣可以係貧窮，呢啲叫「在職貧窮」；試想下，如果一家三、四口靠男戶主搵一萬幾千糊口，仲要住喺租金貴公屋三、四倍嘅劏房，呢一種「在職貧窮」嘅住戶，分分鐘環境仲艱苦過公屋戶（公屋也有「在職貧窮」的情況），咁係咪要幫呢？如果無低收入在職家庭津貼，又無得住公屋享有較低廉嘅租金，我哋嘅社會係咪要任由佢哋喺「自由市場」下競爭生存？   喺「在職貧窮」住戶入面，既然爸爸、媽媽收入有限，亦會出現好多「兒童貧窮」嘅狀況，大家唔好以為「兒童貧窮」只係無錢上興趣班、無得去旅行或者無錢買電腦上網，兒童成長喺貧窮家庭，最嚴重嘅問題係佢哋食飯嘅時候連營養吸收都唔夠，影響埋發育同成長。如果根據領取綜援嘅準則，佢哋未必得到任何補助，但係喺特區政府財政穩健嘅情況下，囍雨絕對贊成政府幫呢啲家庭一把。   社會政策就是財富再分配   至於「老人貧窮」嘅問題，囍雨認為唔只住公屋，就算住私樓、退咗休嘅老人家，一樣會面臨貧窮問題。囍雨讀書嘅時候因為做功課訪問過一啲老人家，佢哋無攞綜援、無仔女接濟，兩公婆無乜儲蓄，生活就係依靠果時每個月一千蚊鬆啲嘅生果金生活，咁少錢食乜好？一係就一餐餸分幾餐食，一係就買一啲平得嚟就嚟過期嘅食物再煮嚟食。喺退休保障（不論貧富或有經濟需要方案）未有具體政策方向之前，對呢啲老人家嚟講只能夠「慳得一蚊得一蚊」，對一個關顧老人家嘅政府而言，囍雨認為最好就係「畀多一蚊就一蚊」，連同長者兩蚊乘車優惠，囍雨真心認為呢啲錢無得慳亦唔需要慳，因為幫助有經濟困難嘅長者，並非「施捨」，而係義務。   對於福利開支喺過去四年增加55%，有啲人會諗政府係咪應該咁用錢，但誠如特首網誌所寫，失業綜援、低收入綜援個案跌至新低嘅數字話畀話我哋聽，如果用多咗錢會「養懶人」，呢啲數字又點會跌至新低。囍雨反而會認為，呢啲措施鼓勵就業之餘，亦恰到好處幫到有唔同需要嘅人。貧窮分好多種，無論係老人、在職、兒童抑或無業的貧窮個案，政府有能力都應該幫；社會政策，本來就係透過財富再分配，幫助社會弱勢人士，如果只係睇住盤數，但基層生活水深火熱，盤數再靚都無用。   原圖：takungpao