近期興起港獨議題，教育局發聲明指如果有教師宣揚港獨思想，可能會違反專業守則，嚴重嘅可以被取消或拒絕註冊教師資格。教育局聲明一出，引起唔少教育界人士嘅熱議，有教師組織代表話教育局有關做法係恐嚇、白色恐怖等等。囍雨認為，我哋必須要先搞清楚一個問題，就係要依法、依理討論，同禁止任何討論，係兩回事。   如果教育局係後者，即係教師連講都唔准講港獨呢個話題，囍雨都係唔贊成嘅，畢竟囍雨都係覺得喺港獨呢個大是大非嘅問題上面，教師應該喺講清楚一國兩制、《基本法》框架嘅情況下，話畀學生知港獨既不可能、亦不現實。教育組織代表如果要強加白色恐怖、唔畀討論嘅帽子畀教育局，囍雨都無話可說。   至於如何討論嘅問題，教育組織代表話有關專業守則要佢哋保持客觀、畀學生獨立思考架喎。無錯，專業守則確實如是這般地說，不過，守則都有講到明教師要尊重法律、維護社會良好風氣，以及關心學生安全；無理由睇住啲學生有違法意圖，做教師嘅唔出聲，叫佢自己諗、自己負責嘛？   教育局局長吳克儉日前到北京同國家教育部會面，之後見記者嘅時候講到明，喺教師嘅輔導下「咩都可以討論」，但要喺《基本法》嘅立場底下討論，又表示相信教師嘅專業。囍雨認為，吳克儉作為教育局局長，絕對有責任就一啲唔良好嘅社會風氣或者鼓吹緊嘅違法風氣發聲，如果連教育局局長都唔出聲，到有違法行為，例如衝擊事件等再出現，先話學生唔可以因為政治思想違法，到時已經為時已晚。   喺度，囍雨真係好想講一樣嘢，就係有啲政客口口聲聲要守護言論自由，唔可以唔畀啲學生討論港獨，但當講到如果佢哋啲仔女要走出嚟抗爭搞港獨，問佢哋支唔支持嘅時候又無言以對，心底上佢哋係咪都覺得搞港獨遲早出事，不過佢哋又樂意見到有人走出嚟反政府，只要唔係自己啲仔女就okay呢？有時啲嘢，己所不欲，勿施於人，如果大家都覺得搞港獨有問題，係咪仲要因為選票高舉言論自由凌駕於其他法律嘅「論述」呢？   我哋要守護言論自由，但守護言論自由同勸導其他人唔好犯法，兩者根本並無抵觸，與其執著於有自由就講乜都得嘅「口水戰」，不如反思一下教師如果真係由得學生講港獨、搞港獨，係咪真係一個專業、負責嘅教師嘅應有行為呢？   原圖：horseof11