喺幾名港獨、本土派立法會參選人被否決選舉提名之後，港獨派人士喺添馬公園舉行咗一場大型集會，有人仲聲言「香港獨立就是香港人唯一的出路」，到「主角」本土民主前線梁天琦上台發言果時，佢有一段說話令囍雨印象幾深刻，就係「黎明之前嘅黑暗，係至X黑暗」，印象深刻當然唔係因為梁天琦講粗口啦，而係在於如果佢哋覺得而家香港處於「黎明之前的黑暗」，理性、和平嘅香港人又何嘗唔係覺得香港處於「黑暗前的黃昏」呢？

爭拗不絕 儼如即將進入黑暗

點解囍雨咁講？曾幾何時，香港呢個充滿奇蹟嘅彈丸之地，由一個寂寂無名嘅小漁港，發展成為一個經濟發達、文化薈萃嘅國際都市，當時喺亞洲就算係新加坡、南韓都未必能夠超越香港。時移勢易，香港因為種種政治、社會問題導致停滯不前，近年出現嘅種種政治思潮，將本來平穩發展、國泰民安嘅香港，變成一個議會難以運作、街頭不得安寧嘅「爭拗之都」，悲觀地睇香港其實係開緊倒車。

如果套用梁天琦嘅講法，冇獨立嘅香港係黑暗，獨立咗嘅香港係黎明，囍雨會認為年前嘅香港係朝陽，今日嘅香港係黃昏，搞獨立嘅香港係黑暗，港獨思潮衰敗、香港重回正軌嘅係黎明。不過，即使獨立思潮衰敗嘅黑暗過後，香港嘅黎明（即再前進、發展）即使再現，到時候香港仲可唔可以重現昔日嘅光輝呢？

違法不斷 政治立場壓倒法治

可能有人會好唔同意囍雨嘅講法，港獨、本土派爭取獨立，點會係「黑暗前的黃昏」呀？囍雨認為，之所以話而家係黃昏，係因為香港而家嘅法治、治安仍然能夠維持，但出現梁天琦同記者打鬥、網民「大起底」兼恐嚇記者、選舉主任半個月內三度被恐嚇甚至到年頭嘅旺角暴動，香港喺光明之中開始暗淡，狀態唔係好似「黑暗前的黃昏」嗎？

講到呢度，囍雨相信一定有人話，梁天琦同記者打架係因為記者挑釁在先，但囍雨想講，作為一個從政者，有啲底線係必須遵守嘅，囍雨唔同意記者做跟蹤報導嘅時候作出挑釁，但唔代表梁天琦可以出手，同理記者亦唔應該出手。到而家警方調查事件，如果記者有犯法，警方一樣會依法起訴佢；梁天琦支持者或者網民不斷喺網上對記者同佢嘅家人作出恐嚇言論，係咪只要立場唔同，就要用威嚇性手段「嚇到人收聲」為止呢？

無錯，《基本法》賦予香港言論、集會、遊行同結社等自由，但有言論自由唔代表可以恐嚇人，有「理由」亦唔代表可以打人，今日嘅香港喺光明之中略帶灰暗，萬一港獨思潮、違法歪風繼續助長，香港要墮入黑暗幾耐，先至見到黎明呢？

原圖：點新聞