學運三子黃之鋒、羅冠聰同周永康因為前年闖入政府總部東翼前地分別被判社會服務令或緩刑，判決後佢哋受訪，大約意思都係表示自己要公民抗命，當時要爭取普選所以「別無選擇」。囍雨聽完佢哋自白之後，對於三人終於肯承擔罪責，囍雨都覺得可以接受，但有一啲問題囍雨認為仍然需要釐清，就係三子認為自己公民抗命無做錯，係咪只要係「為民主、真抗命」就做乜都得？另一個問題，社會對於呢種論述，係咪又要欣然接受呢？   違法佔領行動因他們而開始   一直留意住黃之鋒、周永康等人嘅回應，想睇下佢哋係真心認罪，定係因為被判有罪所以先接受。雖然判決之後佢哋願意承擔責任，但佢哋係咪只要聲稱公民抗命，就能夠將一切行為合理化呢？無錯，學運三子叫人衝入政總之後，佢哋都喺好短時間內被捕，出面嘅違法佔領行動，並非由佢哋「正式」發起；但事實係正正因為佢哋被捕，戴耀廷先「被迫」正式啟動違法佔領行動，如果囍雨話違法行動因為佢哋衝入政總嘅行動而開始，相信都無講錯。   喺學運三子帶領學生衝入政總嘅時候，囍雨無記錯現場都有警察或者公職人員受傷，三子自己抱有民主理想，係咪就可以漠視其他人嘅處境呢？再者，為期79日嘅違法佔領行動因此而打開序幕，佢哋有表達意見嘅自由，係咪就代表佢哋嘅一切行動都合理，就算影響到其他人嘅生活、警察嘅人身安全、政府嘅運作都係無問題嘅呢？   越來越多人「抗命」 全港市民付代價   如果三子依然覺得無錯，會繼續佢哋口中所講嘅公民抗命，下一個非常重要嘅問題，就係其他香港市民應該點樣看待「公民抗命」呢個議題。如果大家覺得只要社運人士例如學運三子、佔中三子甚至本土派等人士抗命完有「找數」就無問題，囍雨就想問喇，如果社會上越嚟越多人走出嚟公民抗命，我哋嘅社會會變成點呢？   囍雨相信，我哋呢啲反對違法行為嘅市民就算有「洪荒之力」甚或「回天之力」都好，都好難改變社會上部分人士要公民抗命嘅現實；不過，如果我哋默許呢啲行為，令到違法者繼續認為違法行動得到支持，到有一日社會有好多人都妄顧他人、動輒「抗命」，最終要陪佢哋付出代價嘅，將會係全港所有市民。   原圖：takungpao