港大《學苑》喺前年主張「香港民族命運自決」之後，立場愈來愈激，論述亦愈來愈「毒」，囍雨本來亦唔想多提佢哋「懶係」行得通嘅主張，點知佢哋近日又發表所謂「民意調查」，今次真係唔出聲都唔得！簡單嚟講，《學苑》今次係「扮民調、作故仔、宣揚港獨」。

如果大家有留意香港各大學所做嘅民調，負責班學者周不時都會解釋民調點做先稱得上「科學化」同合乎「國際標準」等等。今期《學苑》就做出一次最「不科學化」既示範；「報道」聲稱六成幾港大受訪學生支持「港獨」。

見到結果咁驚人，囍雨向來喜歡尋根究柢，梗係睇吓個「民調」係點做啦，點知睇完相關內文嘅第一頁，結論就係「唔使睇落去」，因為呢個根本唔係民意調查！

點解咁講先？係咪同人立場唔同就亂砌《學苑》呀？梗係唔係啦，睇睇今期《學苑》嗰個所謂「民意調查」，第一段引言就講「成功邀請了385位港大同學登入內聯網填寫學苑的網上問卷」。「邀請」？同學填寫？乜唔係抽樣，係「邀請」去做？唔係搵番自己識嗰啲同學仔填咁兒戲呀？

仲有，根據某媒體嘅報道，指《學苑》邀請同學登入內聯網填寫問卷，「終獲」385名港生參與，囍雨真係好想知，咩叫做「終獲」，係咪搵啲同學填問卷，搵得好辛苦咁解呢？

民意調查之所以為民意調查，科學方法之所以為科學方法，係因為有說服力嘅民意調查，唔係在於佢嘅調查結果有幾犀利，而在於佢嘅調查、抽樣方法夠科學，例如科學地搵出一部分受訪者做樣本，去代表整個母體（即所有港大學生）。

根據囍雨膚淺嘅觀察，咁樣發啲問卷出去等人覆，而且又無抽樣，咁嘅「調查結果」，邊可能有認受性？無可否認，《學苑》嘅「民意調查」結果真係好值得留意；我哋要承認，「港獨」思潮喺大專學界係一股潮流，但另一方面，《學苑》將呢股「港獨」歪風無限放大，甚至作故仔講到好多人支持「港獨」咁，呢種手法，乜真係一班聲稱支持「自由、民主、人權、法治」嘅理想主義者所應該用嘅咩？