今日囍雨見到一單新聞，覺得非常好奇，一單關於警員被嘉許嘅普通新聞，竟然會得到「毒蘋果」關注，仲上埋頭條咁「威風」添？一睇之下，原來係大年初二嘅旺角暴動，部份當晚在場嘅警員獲嘉許，包括遇到危險向天開槍示警嘅西九龍交通部警員黃慶威（綽號「高威」）。不過，有關報道嘅主調當然就唔係表揚警察啦，佢哋引述唔同人士，批評警方嘉許開槍示警嘅警員唔恰當，仲話會加劇警民矛盾喎！囍雨真係好奇怪，「毒蘋果」有暴徒又唔譴責，反而去批評受襲同處理暴亂嘅警員，呢個係咩世界？

囍雨向來比較鍾意講道理，作出評論之前通常都會睇返報道先。「毒蘋果」同個別政客話「高威」開槍唔恰當，但有冇人提當日到底發生咩事？囍雨印象就好深喇，當晚班暴徒「殺紅了眼」，不斷追住警察嚟打，圍毆又有、掟磚又有，當時「高威」同其他警員一路退，班暴徒仲一路追住嚟打，警員流緊血？要打！警員瞓低埋？繼續打！喺咁嘅情況之下，如果連「向天開槍」示警都有錯，咁點先叫啱？唔通要企定定畀人打死先叫合理？

事件發展到今日，有喺當晚維持治安嘅警員獲得嘉許，「毒蘋果」唔鍾意咪唔好報囉，但都唔好咁無良心，追住警員嚟打嘅暴徒你哋唔譴責，間接鼓勵暴力都算喇，攞條命出嚟搏嘅警員同警務處就要畀你哋批評，傳媒到底係報道真相，定係基於主觀想法喺度「砌故仔」、「砌警察」先？

再講，有關方面一早已經澄清咗「高威」係因為保護同袍與及自己嘅生命，喺無選擇嘅情況下先開槍，並無違反警例，但有啲傳媒仲要咄咄逼人，硬係要話開槍唔啱。問心，如果係你哋自己生命受到威脅，你哋會唔自保咩？係「向天開槍」喎，唔係向追打警察班暴徒喎！大家可唔可以公平少少呀？

至於一啲擺明只講立場、不問是非嘅政客，囍雨都唔多想回應，只係想講一句如果嘉許警察會加劇警民矛盾，咁追住警察嚟打又如何呢？唔講咁多，大家自己諗。

原圖：takungpao