今年施政報告發表之後，反對陣營、傳媒同激進網民照舊日鬧夜鬧，一時話特首講得太多「一帶一路」、一時又鬧特首將施政報告區議會化喎！老老實實，到底有幾多人親眼睇過份施政報告，知道裡面講咗乜嘢？作出呢類評論既人，只有兩個字適合形容：「涼薄」！

所謂區議會化既段落係乜？原來係講緊166段至179段既「建設長者友善環境」部份！內容包括：一）一系列「讓長者在區內輕鬆安全走動」既建議，包括起升降機、行政通道、行政天橋、行人通道加建上蓋，同埋優化各區「無障礙通道設施」。

二）「增設戶外座椅和其他設施供長者使用」，包括喺公共街市、游泳池、體育館等，加設座椅或者長者優先座，同埋喺公共廁所加設防滑地面、自動感應水龍頭、扶手等，同時考慮喺新建公廁提供面積較大既長者優先廁格。

三）房委會會因應需要，為居住喺舊式公屋而合資格既年老租戶改裝單位，加添寬闊單位大門、廚房門、浴室門，同埋採用防滑地磚等較安全物料。

當然，以盲反政府為己任既網媒，自然執住上面一系列措施嚟玩，話施政報告剩係講廁所喎；囍雨大膽講句，恥笑施政報告建議加設方便長者既設施，包括「考慮喺新建公廁提供面積較大既長者優先廁格」既「人形物體」，實在係可恥同涼薄到極點。政府回應社會訴求，對長者好啲，為老人家營造一個更宜居既環境到底有乜錯？或許你身邊冇老人家，又或者你唔需要照顧長者，如果你可以設身處地咁為班長者著想一下，我相信你班人都唔會拎嚟恥笑。

至於嗰班理應受過高等教育既記者其實都好好笑架，批評建議係「區議會化」喎。囍雨真心請教，到底有邊個區議會可以理晒「全香港」新建既公廁？邊個區議會可以要求房屋委為「全香港」舊式屋邨既長者單位換安全物料？有邊個區議會咁大權力同資源，我真心想班記者指教我呢啲「愚民」。

營造長者友善生活環境，理念其實同照顧殘疾人士一樣，係全社會上下既責任。政府主動去做，無非係想社會更加認識「關愛」兩個字既意義，帶起社會關注長者生活既氛圍。呢啲措施，亦係政府同社會回饋長者貢獻既方法，講真，有啲嘢真係唔係一個「錢」字就夠，對長者既尊重同照顧，其實係社會人心工程既一部份，冇咗對長者、對弱勢既關心，畀你班人反轉個政府又有咩用吖？算把啦！

原圖：go2tutor.com、RTHK