政府考慮「港獨」社團「香港民族黨」，坊間對事件嘅討論可以話係「沒完沒了」，一向偏向支持盲反派嘅法律界團體「法政匯思」，日前就引用歐洲唔同案例，話就算一個團體訴求幾唔合理都好，佢哋嘅「結社自由」都唔應該被干預，仲話歐洲唯一認可禁止或解散政黨嘅案例，係在於有政黨同恐怖組織有聯繫。事實係咪真係咁呢？

另一法律團體：西班牙案例更合適

法律觀點同政見一樣，有時候都係莫衷一是嘅，對於「法政匯思」對兩宗歐洲案件嘅解讀，另一法律團體「香港法學交流基金會」好明顯唔同意，話「法政匯思」舉出嘅案例裡面，有關西班牙案嘅判詞寫到明若然政黨嘅領導人煽動暴力等等，不能依賴「歐洲人權公約」保護云云。到底誰是誰非，就係睇大家點判斷喇！

喺傳媒報道當中，廣男發現咗一個幾有趣嘅地方，就係「香港法學交流基金會」話「民族黨」勾結境外恐怖組織，更訓練成員使用武鬥搏擊技術為「革命」作準備，以示「民族黨」被禁有理；對於呢種講法，廣男唔肯定係點，唯一肯定係「民族黨」講過要「武裝革命」就絕對係鐵一般嘅事實，若然真係有埋「訓練成員」呢一層工作，咁就真係唔禁都唔得了！

政府要待出現「流血事件」出現

廣男唔係咩法律專家，但從已經曝光嘅事實都可以睇到，「民族黨」所作所為絕對唔係「講吓咁簡單」，除咗講到明可以用「任何手段」(包括暴力流血)去達成「港獨」目的之外，佢哋仲早已經「走入校園」、公開派發「港獨」單張等等，即係話早已經由「口頭倡議」發展到「實質行動」，唔通真係要等到有「流血事件」先叫做「有行動」咩？唔係呀嘛？

老老實實，言論、結社自由係重要，但就算唔引用國際人權嘅公約，「普通人」都知道言論、結社自由唔係完全無所限制啦；廣男喺度只係想問班盲反派一句，如果他日再發生諸如旺角暴動甚至更嚴重事件，你哋呢班幫兇，該當何罪先？ 

原圖：Takungpao