政客講嘢真係信一成都死得，唔信？依家又有一單新例子啦！話說內地同台灣地區互遣通緝犯或偷渡犯嘅《金門協議》，喺停擺兩年後再度啟動。台灣當局今次向內地遣送21名偷渡者，當中有一個人格外受到傳媒關注，佢就係內地「民運人士」胡海波。胡海波搞過所謂「工人維權運動」，又去過香港採訪「違法佔中」、參與反修例暴亂聲援示威者。胡海波認為自己喺內地受到「壓迫」，又聽到台灣地區領導人蔡英文講到咁撐「反修例」，願意提供來台協助。於是偷渡去台灣，點知去到之後，佢唔單止被台灣當局關押，仲受到非人道對待，被用槍指住個頭、上晒手銬咁，折騰完一輪就遣送返內地，呢個咪就係錯信蔡英文花言巧語嘅下場囉！

手足們應該深切反思

胡海波被遣送內地呢單嘢，喺台灣當地都引起唔少爭議。台灣嘅陸委會雖然有出嚟解釋，但係啲理據就真係幾搞笑。例如質疑胡海波，喺被收押期間，成日藉友人渠道去講自己點受台灣當局不當對待，話係「刻意詆譭台灣政策」。囍雨想問，台灣當局咁樣對待人哋，佢出聲批評、申訴吓都唔得？而且都有台灣傳媒爆料，話胡海波只係自稱聲援「反修例」，但香港方面無人知道佢嘅身份，而且唔係參與過一場遊行就等於「反修例」。台灣當局嘅講法同做法，真係好值得香港「手足」反思。

無名手足會否被趕走？

囍雨最近成日都見到，好多走去台灣求「庇護」嘅「手足」，都向傳媒訴苦，話申請遲遲都未獲批，期間又無得出去工作、就學，因無了期咁等而覺得好痛苦。呢班人又算唔算「刻意詆譭台灣政策」？台灣會唔會最後趕佢哋返香港？仲有喎，唔少參與反修例暴亂嘅「前線手足」，佢哋蒙晒面咁上街，大家都唔知佢哋身份，如果唔係曾經被捕，可能傳媒都唔會有報道。呢班人潛逃到台灣之後，當局點判別佢哋確實有參與過先？到頭來，會唔會只有「出名」手足獲優待？定係一律話證實唔到，之後就拖延審批，甚至唔批准？

最重要嘅係，台灣嘅政策、政治取態朝令夕改，依家兩岸局勢關係緊張，仲可以重啟《金門協議》。邊個可以保證到，他日風向唔會改變，台灣當局唔會同港府達成「逃犯引渡」協定？依家就算係所謂內地「民運人士」，面對台灣傳媒輿論壓力下，一樣照樣遣返，將來換成係香港「手足」，隨時會有同一下場！

原圖：胡海波Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk