號稱「和理非」代表組織嘅民陣，自成立以嚟，一直搞「和理非」遊行、集會，成為咗反政府陣營動員嘅「中堅分子」；時移勢易，打從反修運動開始，民陣就成為咗「搭台者」，不論係前年6.9晚上以至6.12嘅大衝突等，其衝突起點，都在於民陣搞嘅遊行、集會。據報，近日民陣代表收到社團事務主任文件，指民陣涉嫌違反社團條例，要求民陣以書面向政府提供六項資料，包括成立以來嘅收入來源同開支、銀行同戶口號碼等，以及去年12月舉辦國際人權日聯署嘅目的。廣男認為，成件事好簡單，就係民陣有冇觸犯現行法例，如果有，政府唔能夠因為「政治理由」而放生民陣！
運作多年 不等於「無問題」
對於民陣收到警方文件，被要求提供資料，廣男睇新聞以至網上輿論，就係民陣「一向都係咁，政府依家先嚟問？」，廣男認為，相關人士搞錯一個概念，就係民陣嘅運作，包括無申請或無一直成為註冊社團，唔好話2021年，就算政府2031年先問，都係無問題。廣男認為，經過反修例運動，政府如果認為民陣嘅問題已經變得「不可不處理」，咁依法處理，有乜問題呢？
有一啲重要問題，廣男認為民陣必須回答，而且最好就係清清楚楚交代。例如廣男記得民陣係2002年成立嘅，據報2006年7月申請註冊為社團並獲批，但兩個月後佢哋申請取消註冊，點解要取消註冊？根據《社團條例》，任何本地成立嘅社團或境外社團分支，都須在成立嘅一個月內，向社團事務主任申請註冊或根據《商業登記條例》登記，如果無遵照法例註冊，該社團須停止運作，社團內嘅每名幹事亦屬觸犯法例。嚴格嚟講，民陣係咪已經「犯咗法」？實在值得商榷。
資金來源、流向又如何？
除咗《社團條例》嘅問題，廣男覺得民陣嘅資金以至資金處理問題，同樣值得深究，當中嘅問題包括，民陣嘅資金來源，到底有冇外國勢力嘅資金呢？過去嘅籌款又有無交代呢？一直以嚟，民陣係用乜嘢銀行戶口處理資金或捐款？如果無公開過帳目，民陣嘅帳目又會唔會有啲咩問題？喺呢度，廣男必須講句，如果民陣呢個「組織」係有問題嘅，唔單止民陣本身可能墮入法網，幫佢處理過資金、捐款嘅組織，都可能有「刑責」。
綜觀香港過去嘅「亂」，有時就亂在一啲「本身亂」而又搞亂香港嘅政客同組織，民陣作為反對派搞社會運動嘅「橋頭堡」，係咪想透過唔註冊為社團而逃避規管甚至法律責任？唔駛旨意！
圖片來源：民陣社交網站專頁、文匯報
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論