港獨風波持續發酵，廣男見到教育局嚴詞聲明，指教師如果喺學校裡面鼓吹港獨思想要承擔責任同後果，都估到教育局一定會畀人「狂砌」，話「教局威嚇教師」等等。今日廣男上網再睇報章報導，見到有激進教師組織代表，係咁話教師如果唔保持客觀，只灌輸其中一方嘅觀點，會違反專業咁話喎。講到咁嚴重，於是廣男就攞份《香港教育專業守則》（下稱《守則》）睇下啦，點知發現如果老師「妄顧學生安全」、「唔尊重法律」同「社會接受嘅行為準則」，其實一樣違反咗專業守則，廣男真係睇唔過眼，要就《守則》內容逐點反擊呢啲所謂教師組織代表。   其中一點，就係見到進步教師同盟創會成員、教育人員專業操守議會前主席韓連山話「教師與學生討論問題時，應盡量保持客觀；當公眾意見分歧時，應教導學生尊重不同的立場和觀點等，故不可只灌輸提倡港獨者或政府其中一方的觀點，否則便違反專業」，表面上韓連山講到合情合理，但睇番報導另一名受訪者、教聯會副主席、培僑書院主任王惠成嘅講法，其實《守則》訂明教師「應尊重法律及社會接受的行為準則」，即係話教師都應該尊重法律及社會準則，如果任由學生談論港獨而唔去鋪陳引導，又係咪專業同負責任呢？   另外一點，韓連山引用《守則》，指出教師「應注意時事，關心社會問題，並致力維護良好的社會風氣」，廣男喺度諗，韓連山力撐呢點嘅意思，莫非係指認為學校應自由討論港獨，教師應好好維護？但廣男對於呢一條《守則》有完全唔同嘅理解，所謂「致力維護良好的社會風氣」，唔係應該指教師必須教導學生守法，維護香港良好法治、秩序嘅社會風氣咩？如果學校討論港獨成風、自由放任，教師又要「維護」嗎？   《守則》入面有一點關於「對學生的義務」，廣男認為非常值得留意，但教育界雙方都好似未有注意到，就係《守則》其中有一條寫到「在教學過程中，應關心學生的安全」。大家試想一下，如果學生自行討論得出要搞港獨、搞革命嘅結果，走上暴力流血嘅不歸之路，教師如果唔作出糾正，唔單止係唔尊重法律、社會準則或者社會風氣咁簡單，而係妄顧學生嘅安全、福祉同埋未來。今日，教師唔教導學生尊重法律，唔緊要！但將來，如果自己嘅學生因為港獨而搞到焦頭爛額，請問呢班泛民教師有咩顏面面對佢哋同家長？唔通好似教協啲人話齋，學生為自己言論、行動負責番就算？又係諗住教師咩責任都唔需要孭？卸晒畀學生？   有啲人要講《守則》，話學生要「獨立思考」、教師要「保持客觀」，但廣男想重申呢個係大是大非嘅問題，學生有言論自由，教師肩負嘅係教育、引導學生走入正軌嘅責任，唔係由得啲學生誤闖法律禁區，完！   原圖：網絡圖片