高等法院尋日裁定「一地兩檢」安排符合《基本法》，重申「一國兩制」嘅法理標準應以人大常委會為準，因為人大常委會嘅「決定」，喺香港當可視作有約束力，「決定」嘅效力就等同「釋法」，香港法院，甚至全香港都必須尊重。好喇，法院作出裁決，成日話要尊重香港法治嘅反對派人士，好應該甘之如飴，至少都表達到對法院嘅尊重先係吖，但身為「資深大律師」、成日將法治放口邊嘅公民黨主席梁家傑似乎就唔係咁睇喇，當法院作出裁決後竟然輸打贏要話「不能單靠法治去保護「一國兩制」喎，大家話呢班人係唔係有問題吖！

公民黨已經全面「走樣」

公民黨當初成立，就係以一班法律工作者、資深大律師為骨幹，畀人感覺佢哋係好理性嘅，會尊重法律，而且珍惜法治，唔會輸打贏要自己想點就點。好可惜，今日嘅公民黨已經走晒樣，好似嗰個咁嘅梁家傑，雖然身為資深大律師，但就經常發表一啲有違法律原則同極之非理性嘅評論，好似冇幾耐之前之嘛，佢為咗撐工黨李卓人贏九西補選，竟然話如果李卓人敗選，美國就會取消香港獨立關稅區嘅地位，真係幾誇張都有，結果梗係畀香港人群起恥笑啦。

好喇，咁到底今次梁家傑就住法院嘅裁決講咩呢？梁家傑尋日喺facebook上面話喎，今次裁決證明唔可以再「單靠法治」去保護「一國兩制」同《基本法》，仲聲稱「假如當權者要粗暴破壞體制，司法體制亦難以扺擋」等等；至於同屬公民黨、本身又係大律師嘅立法會議員陳淑莊更話喎，《基本法》已經被中國憲法「騎到頭上」，而今日法庭嘅決定亦說明，法院同意《基本法》對香港人嘅保障「已經被削弱」云云。嘩，真係好肉酸呀，輸打贏要到呢個地步，仍然可以面不紅、氣不喘咁出嚟發表謬論，呢班真係有冇咁噁心呀？

法院只可以跟公民黨要求判案？

要反駁呢班咁嘅政客，講真用常理就足夠，唔使講咁多法理依據。首先，而家公民黨意思係唔係話，即使「司法獨立」同「專業」程度，都喺亞洲首屆一指嘅香港法院，只要唔跟住公民黨嘅意願去判案，咁香港法院就保護唔到「一國兩制」同《基本法》？香港法院係考慮過各方理據同分析後，法官再根據自身法律專業去作出裁決，梁家傑同陳淑莊所講嘅，頂多就係佢兩個認為正確嘅法律意見啫，憑乜話法院唔跟佢兩個意思判，法院就保護唔到「一國兩制」同《基本法》呀？呢啲咪就係傲慢同輸打贏要囉！

先旨聲明，囍雨唔係話市民唔可以批評法院判決，而係批評嘅時候，唔該講出理據同理由，而唔係一味亂鬧囉。講到底，呢班所謂反對派法律界人士，就係唔尊重國家憲法、唔尊重《基本法》同埋唔尊重香港法院，一直以來都只係視香港法院係一定要為佢哋班人心目中嗰一套政治理念服務嘅機器，口中就成日話法治，其實就係政治凌駕專業、政治凌駕法治，做政客做到咁表裡不一、雙重標準，咁你班人不如唔好做喇，留返畀班真心想捍衛《基本法》同「一國兩制」嘅有心人去做啦！

圖片來源：大公報