特區港府公布，由今個月28號起，凡未接種新冠疫苗嘅政府僱員須三日一檢；而由明年2月中起，政府僱員因工作而進入政府大樓同辦公處所，亦須出示接種證明或有醫生證明不宜接種。咁唔跟從要求而返唔到工又點呀？政府話，呢班人將被視為無故缺勤，會按現行紀律機制處理，有關要求適用於所有官立學校同教職員。換而言之，香港社會等了又等，終於等到強制要求教師接種新冠疫苗喇！唔開好心住，今次只限屬於香港教育界「小眾」嘅官校，意味佔絕對多數嘅「公營」同「直資」學校教師仍然有豁免囉！

強制公務員、並非所有教師

今次官校教師要強制接種疫苗，講到底只因佢哋係公務員，又或者係因為公作關係需要進入政府所場，政府其實並無下定決心強制教師呢個接觸小朋友、學生最多嘅行業去打針。點解話官校教師只係小數呢？畀個數字大家睇，自然就會明白：以中、小學為例，根據教育局數據，今日香港中學及小學一共有1,095間，當中屬於官立中、小學嘅，其實一共只有60幾間，單睇呢個數字，已經知道官校教師肯定只佔香港教師嘅小部分。

其實，要求教師接種新冠疫苗並唔係乜嘢新鮮事，世界各國嘅例子多不勝數，隨便已經舉到好多例子，好似美國、新西蘭、澳洲、意大利等等都有類似安排，而歐洲國家奧地利明年2月1日開始，更加就實施全國強制接種疫苗。講到底，強制接種疫苗，目的除咗係為保護教師自己，更重要其實係為保護學生；教育的「根本」就係學生，學生嘅福祉，喺教育呢個範疇肯定凌駕其他持分者嘅個人利益之上，正如醫療嘅最大持分者一定係病人一樣，教育界喺保護學生呢件事上，絕對唔應該妥協、亦唔可以妥協！

隨時出現防疫漏洞

香港至今仍然未有強制教師同醫護人員接種新冠疫苗，呢一個安排實在十分唔理想。學生同病人都係最需要保護嘅一群，佢哋當中，因為各種理由，好多都唔能夠自我保護，囍雨到呢一刻都唔明白，當局點解始終唔肯實施強制接種。如果話因為香港疫情穩定而冇咁嘅需要的話，咁就真係太短視喇，唔通真係不幸出事先去補救咩？近期新冠變種病毒OMICRON來勢洶洶，政府再唔強制教師、醫護接種，一旦變種病毒真係殺入社區，小心呢兩個界別成為防疫漏洞，到時就大件事喇！

圖片來源：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk