許智峯出盡辦法，製造一場「大話西遊」潛逃記，近期各界對佢嘅關注，由佢嘅潛逃故事，轉而關心佢同佢家人嘅銀行戶口狀況。囍雨睇到一單幾有趣嘅新聞，而且係由《生果報》報道，話說許智峯曾提及家人喺恒生同中銀嘅戶口「均受牽連」，但據悉到目前為止，佢父母喺兩間銀行開立嘅戶口從未被封鎖凍結，而許智峯就回應傳媒，稱「牽涉太多家人私隱，不便透露。至於早前發布的資料，是正確無誤的」，許智峯係咪又講大話呢？佢嘅醜聞，真係越揭越多！

大話「一個接一個」？

日前，一個丹麥政界人士喺社交媒體公開咗許智峯嘅「出走秘密」，原來未有DQ四名勾結外力嘅立法會議員前，許智峯喺九月已經密謀潛逃，而對方就幫佢製造「氣候變化」會議嘅「外訪行程」，最終許智峯成功「逃走」！依家關於許智峯同家人戶口又問題多多，講真，許智峯講嘅嘢，仲有邊個會信佢呢？

當大家焦點都放在喺許智峯同家人銀行戶口時，囍雨想提提大家，雖然許智峯聲稱自己已經「流亡」，但大家有冇見佢話自己已經辭去中西區區議員嘅職務？唔覺有喎！即係話，許智峯可能仲出緊區議會人工，每個月至少袋緊三萬幾元薪酬！

請盡快取消其議員資格

據官方講法，如果有人辭職，政府會按程序處理，而根據《區議會條例》，任何民選議員連續四個月無出席區議會會議，又無喺限期前取得區議會同意，會失去議員資格。對於呢個說法，係咪只要許智峯唔辭職，佢仲可以袋多四個月糧呢？即係人已潛逃、但人工照出？囍雨想問，如果一間公司，有個員工失聯，講明自己傷害完公司「遠走他方」，間公司仲要出多幾個月糧俾佢？好似唔係好合理喎！

一個畏罪潛逃嘅政客，一個可能已經觸犯咗《港區國安法》嘅政客，竟然仲可能喺外國「食住炸魚薯條」出政府糧，大家接唔接受呢件事？為官者，最忌就係避事，依家許智峯已經講明自己已經「著草」，政府係咪應該研究下相關法律，盡快依法DQ佢呢？唔好忘記，許智峯依家可能袋緊嘅人工，全部都係公帑，即係要市民供養一個逃犯，荒謬咗啲喎！仲有，許智峯潛逃、眾籌後走人，其他民主黨人又有冇咩角色，囍雨覺得執法部門應該繼續追查。 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk