15歲女生陳彥霖喺舊年離世，事件引發各方尤其係反政府一方嘅「無限揣測」，有說法甚至推到極端，稱陳彥霖係被警方「殺害」；近日，死因庭完成聆訊，死因裁判官引導陪審團時剔除陳彥霖「非法被殺」以及「自殺」選項，陪審團最後裁定陳為「死因存疑」。換句話說，雖然死因庭裁定陳彥霖係死因存疑，但明顯已經排除咗佢係被「非法被殺」，所謂警方「殺人」、「毁屍滅跡」等指控，乃子虛烏有。
謊言不可一 更不可再
對於死因庭嘅裁決，囍雨覺得最大嘅啟示，莫過於攬炒派及黑暴支持者嘅「指控」，根本站不住陣腳，裁判官引導陪審團時剔除「非法被殺」嘅選項，就係最佳例證。過去一年，黑暴分子先表示陳彥霖被「非法殺害」，繼而劍指警方，之後陳彥霖母親出嚟澄清女兒精神有問題，黑暴分子甚至稱陳彥霖母親都係假嘅；一切一切，或者整個「故事」，只係朝住一個方向發展，就係「劇本」要符合黑暴運動嘅邏輯，要對警方有強烈「指控性」，但警方「殺人」證據呢？對唔住，係無嘅。
陳彥霖事件，係黑暴運動中其中一個「標誌性」嘅「故事」，「故事」開初，有濃厚嘅指控警方、政府意味，但隨住故事發展落去，大家會發現，其實黑暴分子設定了「故事框架」，但證據欠奉，而警方就一次又一次受到攻訐，澄清幾多次都依然有人抹黑佢哋，呢啲「故事」，仲包括8.31太子站事件、爆眼女事件、新屋嶺性侵事件及沙嶺墳場事件等等。
再炒作事件 尤如二次傷害
如果黑暴分子仲要繼續炒作事件，偏要相信無事實基礎嘅「故事」，其他人都無辦法；不過，囍雨必須要講句，繼續炒作呢啲故事，首先係對死者家人嘅二次傷害，以陳彥霖母親為例，失去女兒，已經係極度傷痛，但失去女兒還要被抹黑、詆譭，甚至上完庭要俾人圍住嚟指罵，囍雨想問下，到底陳彥霖母親係受害者家屬，定係有人當佢係「施害者」呢？
黑暴運動既催生出暴力，亦催生出煽動更多仇恨嘅謊言，呢啲謊言只會令唔同市民之間嘅誤解、仇恨更深，繼而又會催化更多暴力衝突。作為普通市民，面對一個又一個謊言，我哋必先就唔同事件問一句，呢啲係事實嗎？證據呢？
請Follow我們的YouTube頻道：
下載我們的手機應用程式，收看第一手精彩內容：
評論