前兩日，一班攬炒派區議員搞咗個所謂「十八區民主派聯絡會議」，佢哋聚埋一齊嘅目的，簡單嚟講就係反對「港區國安法」，攬炒派反政府、反中央，當然唔係咩「新聞」啦，但令廣男覺得好奇怪嘅一點係，廣男睇唔同新聞，基本上都睇唔到攬炒派嘅「大哥、大姐」在場，亦唔見攬炒派有咩身兼立法會議員嘅區議員在場，到底係廣男「眼大睇過籠」見唔到，定係一班攬炒派重心人物怕「有手尾跟」，所以唔敢在場，由得班「年青力壯」嘅攬炒派區議員自己走出嚟做「炮灰」？呢件事實在耐人尋味！
「大哥們」 你在哪兒？
以廣男所知，攬炒派有唔少身兼立法會議員嘅區議員，包括民主黨鄺俊宇、涂謹申、林卓廷、尹兆堅以及街工嘅梁耀忠，但廣男呢幾日睇新聞，都好似唔見呢幾位「大哥」有參與所謂嘅「民主派聯絡會議」，當中係咪有咩問題？
會議當日人頭湧湧，可能佢哋有出現，只係廣男睇新聞「見唔到」；但如果佢哋真係無出現嘅話，廣男估計，佢哋擺明就係「縮」，怕出席過呢啲「非法會議」，會累及自己嘅議席、「錢程」。大家諗下，之前《國歌法》表決，明明攬炒派係反對嘅，但到投票果時，竟然除咗熱血公民鄭松泰，就無攬炒派投票，當中原因，已經有人分析過，係因為攬炒派怕投咗票，喺日後通過「港區國安法」之下，自己可能會被DQ，所以連反對票都唔敢投。去到日前嘅「聯絡會議」，一向錫身、視「議席如生命」嘅攬炒派頭頭，當然亦唔會現身啦！呢班攬炒派政客，成日話要抗命，但實則係貪生怕死至真！
螳螂捕蟬 黃雀在後
至於一群年輕、有「幹勁」嘅攬炒派區議員，廣男溫馨提示，請你哋「睇真啲」啲前輩做緊乜啦，一有「港區國安法」立法嘅消息，攬炒派元老李柱銘話「寧願要23條立法」，戴耀廷話如果法例有追溯力佢會「收聲」，攬炒派議員甚至喺立法會連《國歌法》反對票都唔投。如果你問廣男，廣男會答你哋，有政客已經開始逃避緊「罪責」；他日如果有年輕攬炒派區議員因為違例而被DQ，呢班老一輩攬炒派仲可能會派人參加補選「食埋個位」，名符其實「螳螂捕蟬，黃雀在後」。廣男覺得，喺年輕嘅攬炒派議員背後，已經有班「老牌政客」計緊數，一邊自保，一邊諗住點攞盡政治甜頭喇！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論