自去年年底區議會選舉後，各區區議會都出現一種「越權」歪風，有區議會要求處理區內入境事務，甚至處理「政制」問題，各種「光怪陸離」嘅動議不斷出現，將區議會「自行升格」到好似行政會議咁款。今日，廣男睇新聞見油尖旺區議會有議員動議解散區內防暴隊、改革監警制度甚至檢討警務處處長權力。廣男必須指出，呢啲動議、行為唔單止係「越權」，簡直係喺度「僭建權力」，當香港係佢哋「管治」！

 

動議不符區議會職能

 

就如油尖旺民政事務專員余健強所指，區議員提動議須合乎區議會條例，有關動議文件標題要求重組一個政府部門，更涉及制度、法律、政策等檢討改革，既超出地區範圍，亦唔符合法例訂明嘅區議會職能，所以專員早前已表明立場，佢、秘書處以及其他政府代表唔會參與討論。簡單嚟講，就係有人「越權」、「僭建權力」，政府官員同代表無可能陪班盲反派議員做「違法的事」！

 

鬥爭優先 地區福祉被犧牲

 

點解有議員可能明知自己「越權」，仲要提出呢啲動議呢？答案其實好簡單，就係玩政治炒作！大家須知道，依家好多盲反派議員，唔係靠地區工作、深耕細作「上位」，而係食黑暴運動嘅「人血饅頭」同埋炒作政治上位嘅，如果佢哋入到區議會唔搞政治炒作，咁點「對得住」班激進支持者呀？用另一角度睇，佢哋選擇咗「政治鬥爭優先」，咁區議會就無可避免地成為「批鬥場地」，政治、民粹主導，本來最應該重視嘅地區議題、地區民生事宜，就好可能會被擺埋一邊。

 

講開油尖旺區議會，廣男覺得最新近、深刻嘅例子，就係有油尖旺區議員，竟然要求拆咗區內用嚟預防罪案、協助警方調查罪案嘅「天眼」（閉路電視）；當預防罪案嘅工具都可以因為「政治理由」被要求拆除，依家啲盲反派區議員，為咗政治，仲有啲咩做唔出？執筆之時，廣男見到有報道指有議員打算舉報油尖旺民政事務專員余健強，稱余「離席」涉「公職人員行為失當」，原來盲反派區議員自己「越權」，仲可以話政府官員「失當」，今日香港，的確係「誰大誰惡誰正確」… （嘆氣）