涂謹申「私生活」謹唔謹慎?
涂謹申「私生活」謹唔謹慎?

警務處一哥鄧炳強日前同一班明星足球隊成員聚餐聯誼,網上流出相關影片之後,一眾黃絲、黃媒「如獲至寶」、大造文章,不斷追問有冇「私用公帑」、「私相授受」;盲反派黃議員涂謹申更加「諗得多」,由「一餐飯」推演到鄧炳強「不是一個對自己私人生活謹慎的人」,繼而質疑佢「運用公權力的公正性」問題。廣男又想問下,警察係咪唔可以有自己私人生活、私人朋友呢?係咪同朋友食餐飯都唔得先?依家成班黃友喺咁一味針對警察、警隊,連人哋私人時間都要管埋,都真係幾惡喎!


被上綱上線的私人飯局


廣男都睇過相關網片,呢場飯局之所以受大家「關注」,主要係因為出席者大部分都係大家熟悉嘅警隊人物、演藝名人;對於外界質疑,警方已經明確回應,聚餐費用根本唔涉公帑。廣男橫睇掂睇,「呢餐飯」都只不過係一場私人性質嘅活動。講真,警察又好、官員又好、甚至明星都好,喺自己私人時間、私人地方,佢哋都只係普通人一個,廣男就實在睇唔到點樣如涂謹申所講,食呢餐飯就會影響形象、尊嚴、同埋公權公正性。


當然,作為公眾人物,市民大眾以高標準去要求佢哋,廣男覺得冇問題,但「高標準」,等唔等於雙重標準呢?廣男見到呢兩日網上都流傳緊一張舊相,畫面所見,係涂謹申喺一個飯局,一樣係同一班知名演藝人事合影,包括成龍、陳欣健(前警察)、導演爾冬陞、徐克等等,氣氛亦都樂也融融。廣男唔知呢張相係幾時影,但如果屬實嘅話,咁套用涂謹申自己嘅邏輯,佢作為堂堂嘅資深立法會議員,出席呢啲場合,係咪可以形容為「私人生活不謹慎」、議員壞榜樣、運用權力「有問題」呢?


請盲反派自己照照鏡吧


廣男都係果句,其實無論警察、官員、議員、定係明星,佢哋同普通人一樣,都會有自己嘅私人空間、私人朋友、交際活動。當盲反派成日有口話人時,自己又有冇照下鏡、睇下自己有冇問題?抑或只要對住唔係「自己友」,就必定堅守雙重標準嘅原則呢?廣男就話,當呢班盲反政客成日講所謂「人權、自由」時,大家又應該問下,點解佢哋就可以有同外國政客「食飯」嘅自由,而一哥就連會一會私交嘅權利都冇?


原圖:網絡截圖


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

23
搞笑咩
10
好好笑
2
唔係呀哇

評論