近年社會出現一股令人難以適應嘅歪風，好多所謂「抗命」者明明犯法，但被拉、被告嘅時候仍然振振有辭，一時話自己被「政治打壓」，一時又話「違法有理」，總之千錯萬錯都唔係自己錯咁。近排有單審緊嘅案件，案情係「熱血公民」副主席鄭錦滿因為將公共圖書館嘅圖書掉入「垃圾箱」，被控盜竊罪，上述案情控辯雙方已經同意，但鄭錦滿仍然堅持咁做係「對抗文化入侵」。鄭錦滿最終會唔會有罪，而家未有人知，但市民其實都應該要問：「因為有不滿，所以做乜都得」？

不滿就可以漠視法紀？

鄭錦滿一案，根據控辯雙方都同意嘅案情，係被告將圖書館幾本簡體字書掉入圖書館大堂嘅垃圾箱度，而根據鄭錦滿嘅答辯，佢咁做嘅理由就係要「表達不滿」，同埋呼籲公眾「對抗文化入侵」。老老實實，自從「違法佔領」後，好多市民真係以為只要有不滿，就做乜都可以，連犯法都得。鄭錦滿自己都承認係擅自將屬於政府擁有嘅圖書掉入垃圾箱，就算佢有咩理由都好，咁做都肯定有問題啦。

廣男認為，類似鄭錦滿呢種以為「不滿」、「抗命」，就可以胡作妄為嘅理念非常危險。試諗諗，如果鄭錦滿嘅行為能夠「合理化」，咁第時其他反對「熱血公民」嘅人見到屬於該組織嘅物品，甚至係成員，唔通又可以出手損毀，甚至暴力襲擊咩？唔可以吖嘛，因為香港係唔容許「行私刑」嘅法治社會；呢個道理咁簡單，小朋友都識啦！

尊重法治 就應拒用非法手段

類似鄭錦滿等人嘅所謂「抗命」行為，其實正正係同香港核心價值「法治」相違背。「法治」唔係剩係講緊人人都要守法，而係就算你有道理或者不滿都好，都必須用合法手段表達，否則你都會違法；如果有人因為不滿就作出涉嫌違法嘅舉動，難道呢啲舉動又唔係破壞香港嘅法治傳統咩？

近年有「違法抗命」嘅思潮興起，社會好似對一啲懷疑違法嘅行為越嚟越「不以為然」，「違法佔領」係咁，「旺角暴動」都係咁。大家千祈唔好覺得「不滿」、「抗命」而懷疑犯法係好小事；呢股風氣會不斷滋長，同時一步步破壞法治，當新一代青年人都覺得「抗命先於守法」，咁社會秩序又點會良好呢？香港人嘅自由，又有邊個可以保障呢？

原圖：Takungpao