近期無綫有套話題作品，叫做「有樓萬事足」，呢個節目未正式啟播已經引起全城熱話，入面「冇樓咪白撞」嘅港女、「月儲105%人工」嘅90後同埋「每日用50蚊」嘅老師、「結婚租樓住好無臉」嘅準夫婦等等，全部Case都相當「吸睛」。但會唔會只係極端例子，社會上大部分年青人真係會為咗買樓去到咁盡？不過香港始終有好多人都係想有個「安樂窩」，廣男都有睇實財爺陳茂波公布嘅《財政預算案》，未來私樓落成量每年逾20,300個，咁大家係咪要睇定啲先呢？

要上樓 小心「黑天鵝」

廣男唔否認，自己同屋企人都好想買樓，等一家人可以有個屬於自己嘅「安樂窩」，但而家係咪真係入市好時機呢？廣男對樓市始終有一定保留。第一，而家樓價高企一個主因係全球熱錢多，除咗本地居民仲有唔少資金流入香港樓市；第二，而家樓價到底真係市民可負擔水平，定係一個本地市民都負擔唔起，靠外來資金、炒家或者年青人靠屋企人幫助先應付到嘅樓價先？有樓市專家就講過，美國加息、供應增加同埋內地買家購買力減少呢三隻「黑天鵝」只要出現其一，樓價就會下調幾個百份點。

預算案指每年逾二萬私樓落成

美國會唔會加息，或者內地買家購買力如何廣男就唔知，但睇番今年嘅《施政報告》同《財政預算案》，未來3至4年私樓供應大約有94,000個，比本屆政府上任時高出45%；如果計未來5年嘅私樓預計落成量，每年平均約有20,300個。橫睇掂睇，未來幾年私樓供應都算充足，如果美國加息等因素同時出現，到時個樓市會點，真係好難講！

唔單止咁，而家全球市況唔明朗，美國有特朗普上場、英國要脫歐、意大利等國家經濟又疲弱，香港作為一個外向型經濟，萬一其他地方有經濟危機，香港股市同樓市都未必可以獨善其身。

呢啲因素出現嘅話，樓價係咪一定跌？又未必嘅！試諗一下，如果下屆特首上台撤辣招，大開中門畀國際投資者及炒家，又或者放慢手腳覓地造地，今屆政府做落嘅工夫，包括土地儲備、公私樓供應，好快就用完，喺長期供應不足嘅情況下，樓價就唔會咁容易回落。所以呢，邊個做特首，邊個願意喺土地房屋政策努力，真係唔好當唔關自己事！

原圖：無綫電視截圖