潮流興「眾籌」，創業可以「眾籌」、選舉又可以「眾籌」、打官司告人可以「眾籌」，自己被人告都可以「眾籌」架，夠犀利啩？不過敢問一句，到底打官司對社會有咩貢獻，點解要「眾籌」呢？

講緊嘅當然係幾名宣誓時「玩嘢」，有機會被D.Q. 嘅議員，點解佢哋玩嘢，要市民幫你埋單先？幾名議員涉嫌宣誓時違反《基本法》、《宣誓及聲明條例》，畀政府司法覆核佢哋嘅議員資格，其中九龍西議員劉小麗近日喺自己地頭掛上多條橫額，為自己單司法覆核籌款，有區議員寫文章批評佢利用公共資源籌款。對於劉小麗啲橫額位點用法，廣男冇興趣知，反而想提醒大家，佢籌款打官司其實同守護公義無關，只係佢自己「玩嘢」玩大咗，而家想全港市民同佢一齊找數！
 
宣誓「慢讀」猶如玩火
 
如果大家有睇過劉小麗第一次喺立法會宣誓嘅過程，都會見到佢以「龜速」讀出誓詞，好似分開咁讀一個個冇意義嘅單字咁，用佢社交網站原話就係：「昨天（筆者按：即宣誓當天），我將官方誓詞逐字宣讀。誓詞變成九十多句毫無連貫性的句子，沒有任何組合、連結及意義，令聽眾無法聽到任何句式及語氣。這樣，一切意義就純是觀眾自行分句，主觀判斷造成的憶測而已。」

嗱，唔講人大常委釋法，大家應該記得夏正民法官2004年嘅判決，都講到明根據《基本法》第104條規定嘅誓言，係候任立法會議員嘅強制性憲制責任，議員要以符合《宣誓及聲明條例》嘅方式同形式宣誓，如果議員唔符合要求，因而改變誓言嘅實質意義，就違反咗《基本法》，屬於唔合法、無法津效力。
 
換句話講，劉小麗自己都大大聲話自己宣誓時所讀嘅誓詞冇意義，試問又點構成有效嘅宣誓呢？如果劉小麗依法宣誓，但畀政府提告，咁佢話要守護議員資格、公義都仲講得通，但而家佢自己挑戰法律，喺鎂光燈下「玩嘢」、「博出位」，玩過火就想眾籌打官司，想市民同佢一齊找數，合唔合理先？
 
誰打壓誰？
 
劉小麗有錯唔認，明明自己涉嫌違法，就話係政治打壓，講到自己完全冇錯咁！廣男想問，如果有人涉嫌違法，執法者應該依法執法，定係有法不依先？試想想，有學生犯校規，被懲罰嘅時候話係老師針對，咁係咪又係老師錯呢？好顛倒是非喎！

又有非建制派搬出「無罪假定」論，話法庭一日未判，劉小麗一日都係「無罪」。廣男同意架，所以咪應該由法定決定係咪撤銷佢議員資格囉！呢篇文唔係話劉小麗一定有違法，只係想講，當日佢主動「玩嘢」，大家都清楚睇見，今日要市民同公帑或者「眾籌」去幫佢埋單，好唔公道囉！
 
原圖：takungpao