特首梁振英發表任內最後一份施政報告，各路人馬梗會為佢計下數，睇下佢啲政綱有冇「走數」啦！喺呢個「年度」總結，廣男發現咗一個幾奇怪嘅現象，就係有啲好重要下嘅民生政策，例如房屋、退休保障同埋標準工時等，其實梁振英都基本上落實咗政綱承諾，不過有啲人係都要話佢「走數」，唔通假話講一百次，就會變真話？

「走數」之說 純屬虛構

喺梁振英政綱最受關注嘅房屋部分，有啲人話佢做唔到嘢，廣男睇番啲數字，公屋供應的確係未夠多，不過如果對畀番上一屆政府嘅數字，其實今屆政府公、私營房屋起咗近13萬個單位，最少都畀上屆多3%；而最重要嘅，係未來幾年公、私營房屋供應充足，公營房屋喺未來5年畀上任時多37%，有94,500個單位，私樓未來3至4年就有94,000個單位，足足畀上任時多45%。幾年之間增加咁多土地、房屋供應，唔好話冇「走數」，直頭係「交足數」有餘。

至於退休保障同標準工時嘅問題，廣男想問下班「盲反派」到底有冇睇過梁振英嘅政綱？退休保障方面梁振英政綱根本就冇寫過會落實或者推行「全民退保」，最主要果項都係寫喺生果金上面加一項特惠生果金，呢項措施就係而家有40萬人受惠嘅長者生活津貼，而且梁振英喺今次嘅施政報告仲宣布會優化長者生活津貼，合資格長者最高每月可以攞到3,435元。唔欣賞政府優化長者生活保障，唔緊要，但不斷講、不斷屈梁振英冇做「全民退保」係走數，好似講唔過去喎！

習非成是的政客

至於標準工時嘅問題，同樣道理，如果大家睇番梁振英政綱，上面寫到明政府會成立研究標準工時嘅委員會，而並非落實標準工時，當某啲政客重複又重複話佢「走數」嘅時候，廣男又想問，有承諾就有「走數」，如果只係講研究相關問題，又邊度有「走數」呢？

廣男真心認為，而家嘅政治氣氛的確令人透不過氣，因為就算政府已經落實承諾，只要立場唔同、政治光譜唔同，捉住你幾句「似是而非」嘅說話，就可以大造文章一番，然後話你「走數」、「唔兌現承諾」，再配合其他同黨日講夜講，市民聽得多，好容易就會信以為真。當政治環境變到咁「習非成是」，唔好講政府難唔難做，我哋應該問下呢啲「將大話講一百次變真話」嘅政客，你哋連道理都唔講，點從政、議政同論政呢？

原圖：RTHK