一萬人嘅集會，話大型唔算勁大型，但話蚊型咩，又一定唔係喎。尋日就有一萬名市民，浩浩蕩蕩去到金鐘集會，目的無非係要表達對「青年新政」兩名議員以非人道方式瘋狂辱華嘅不滿。小弟尋日亦參與其中，無他嘅，我係中國人，我就有責任發聲；事發至今最令人唔明白嘅，始終係一班自認中國人嘅非建制派議員，點解佢哋會對「青年新政」兩個議員無限容忍，而且一句譴責都冇。唔通要非建制派做正確嘅事，真係難比登天？

民意對「辱華」事件嘅意見其實非常清晰，坊間一面倒聲討同反對，非建制派冇理由聽唔到。今日，立法會主席梁君彥裁定佢兩個暫時唔適合宣誓，非建制派立刻群起反對，一時又話梁君彥違法、一時又話建制派議員流會係破壞立法會嘅元凶等等，小弟聽到呢啲說法，除咗「得啖笑」三個字之外都唔知再講乜好。

事實上，喺「法」、「理」、「情」三方面，非建制派都唔應該支持「青年新政」，建制派反對佢兩個，亦係「情理之舉」，而家等我慢慢講大家聽點解。

在「法」，多名法律專家，包括香港大學法律學院教授陳弘毅，以及資深大律師湯家驊都講過，押後畀青年新政兩個人宣誓，等法院先有裁決，其實一啲問題都冇，話梁君彥「違法」，基本上已經唔成立。

在「理」，而家都冇人直接剝奪「青年新政」兩個議員嘅資格，大家只係要求暫緩畀佢兩個宣誓啫，等到法院有裁決之後，如果佢兩個真係打得甩，到時再宣誓唔遲吖。喂，呢個安排好正常喎，法例講明做議員要先宣誓，大佬，佢兩個而家正正係宣誓程序上出咗問題，所以畀政府司法覆核吖嘛，做乜而家講到係「未審先判」先？根本冇人「判」佢有問題，唔好老「屈」好喎！

在「情」，「青年新政」侮辱日本侵華戰爭二千萬死者、侮辱全球華人，反對佢兩個繼續做中華人民共和國香港特別行政區立法會議員，根本就係應有之義。小弟認為，建制派盡一切方法去阻止兩人宣誓，成件事根本就係站喺道德高地，亦係大條道理，根本一啲虛怯都唔需要有。做咩先，企喺「人道」立場，阻止「反人類、反人道」嘅政客掌權有咩問題？而家「非建制」派係唔係企喺全球華人對立面先？

原圖：takungpao