♩ ♫ 如敗倒 再掙起 永沒言死 才是活著的真理 ♪ ♬    唔好意思，廣男見到李慧詩受傷依然奮勇作賽，雖然無獎牌，但佢果種鬥心，即刻令廣男諗起郭富城「強」呢首歌。奧運場上，的確係winner takes all嘅遊戲，但大家都無忘記，運動場都係一個畀選手展現運動家風範嘅舞台，雖然李慧詩最終都無喺里約奧運鸁得獎牌，但佢帶畀港人嘅，係一種令人敬佩嘅「打不死」精神，呢種精神傳播，其實仲緊要過獎牌。   先天不足、受傷 無阻運動員心志   可能大家見到李慧詩身形健碩，以為佢天生就係做運動員嘅材料，呢個其實係一個表象。廣男曾經睇過傳媒報導，話李慧詩讀書嘅時候本來充滿短跑天分，但因為貧血被要求轉攻單車，因為佢先天不足又半途出家，要付出畀其他人多嘅努力，先至造就到自己嘅「強將」身份。喺佢運動生涯中，更曾經因為重傷爭啲要放棄繼續做運動員，連教練都一度想勸佢退役，不過佢負傷在身都依然艱苦訓練，最終揚威國際。所以，佢得到嘅每一項榮譽，都係有血有汗，辛酸不足為外人道。   為達理想 放棄共聚天倫時間   本來，李慧詩係香港選手喺里約奧運奪取獎牌嘅一大希望，廣男就算唔多留意奧運新聞，都一直有留意住李慧詩嘅最新消息，佢喺凱琳賽因為「炒車」而未能晉級之後，受住傷叫大家唔好擔心佢，佢會專注準備之後嘅賽事，廣男認為果時佢除咗要承受身體嘅皮外之傷，一定承受住常人所不能承受嘅壓力。過去幾年佢一直苦練，不時要離開香港練習，連同家人共聚天倫嘅時間都放棄，就係為咗奧運賽事，到喺凱琳賽「炒車」、爭先賽失利，佢忍唔住喊出嚟同表示「對唔住」嘅時候，其實香港人一樣咁心痛……   香港人，總係被認為係拼搏、「打不死」，今屆奧運會李慧詩未有取得獎牌，但佢向全香港、全世界展現嘅，係香港人堅毅不屈、永不放棄嘅運動家精神，香港市民會一直支持佢，因為佢係香港人嘅驕傲。我哋唔知道，李慧詩會唔會參加2020年嘅東京奧運，但無論佢嘅決定如何，香港人都一定撐佢！   原圖：exmoo