佔中三子同一班人去自首，梁麗幗姐姐又話遲啲會去自首，仲有200幾人响金鐘坐喺度宣稱公民抗命所以心甘情願被警方拉，嗱嗱嗱，呢啲通通都係你哋自己講架，做咩近排阿SIR真係嚟拉你地啦，有人又大大聲鬧警察做咩「秋後算帳」，嘩，勁無賴囉！唔係諗住自完首警察唔執法呀嘛？

講真，阿SIR都好GENTLEMEN架啦，先係打電話畀你，約你去警署，仲要講埋畀你聽有機會用咩罪名拉你添！唔信？岑敖暉都話自己前日去完旅行番嚟就收到O記電話，講明佢同多宗非法集結嘅案件有關，「但我未覆實佢(警方)架，因為我都覺得我認為我要同其他被邀約、被警方拘捕嘅朋友傾傾點應對，同埋同律師團隊傾傾點處理，先至諗住覆實佢。」

嗱嗱嗱！係咪呢？連一直支持佔中嘅傳媒人王慧麟，都喺自己節目讚警方今次係文明執法呀，照晒程序去做，又畀晒機會你地啲佔領者，去搵律師同記者喺正警署外邊等你哋做「大龍鳳」，連王慧麟都話仲有咩好批評呀？忍唔住都要講句呀，咁包容嘅警察真係唔知係邊度搵呀，辛苦哂咁多位阿SIR同MADAM呀！