抗疫靠反對派區議員?別說笑了
抗疫靠反對派區議員?別說笑了

囍雨今日聽電台時事節目,竟然聽到有電台節目主持人講,依家香港因為DQ咗大批反對派區議員,所以搞到有物資都無足夠人手派,而現任區議員同地區人士都唔係好幫到手,令到市民受苦咁話。囍雨想講,佢嘅講法,完全係抹殺晒一直喺地區努力抗疫嘅人員,建制派區議員近期空群而出去幫街坊手,有人派檢測包等物資,甚至係為確診者買糧食送上門,只要喺社交網頁搵一搵,就會見到多相關資訊。唔知嗰班電台主持人真係唔知道,定係有意忽略,但作為傳媒人咁講,真係有失公道。


反對派議員咎由自取


佢哋應該搞清楚一件事,點解班反對派區議員會辭職、比人DQ先?係因為佢哋唔符合宣誓要求,或許怕比人DQ要賠薪津等問題而辭職。佢地「無得撈」係自己問題,唔好講到係人哋有錯咁。如果佢哋一直盡忠職守、符合法律要求,咪可以繼續留任,為街坊服務。班電台主持人仲講到,就算反對派區議員有得留任,政府都未必肯同佢哋合作,但呢一樣根本係假設性推論;事實上,依家仲有反對派區議員留任緊,似乎又無見到佢哋有投訴過有呢方面問題。


囍雨覺得最好笑嘅係,班電台主持人嘅前設,係已經假定咗之前嗰班反對派區議留任的話,係會幫手防疫,呢一樣同大家嘅認知已經有好大落差。仲記得前年疫情剛剛爆發,屯門區議會提議買口罩派街坊,反對派竟然唔係買醫用口罩,而係批出130萬元買「豬嘴」(防毒面具),最終在社會壓力及民政事務專員反對下否決;仲有深水埗反對派議員動議,要求政府永久擱置普及社區檢測同「港版健康碼」。佢哋根本就將疫情當成搞政治鬥爭嘅機會,不斷搵機會去找政府麻煩。囍雨真係好懷疑,反對派根本係視政治仲緊要過人命,咁樣嘅人真係會幫手抗疫?


抹殺地區人士的默默付出


絕大部分現任區議員真係疲於奔命參與抗疫,好多媒體都有報道過,班電台主持人點會睇唔到?仲講到好似人哋無咩幫手咁,呢種講法完全係不負責任。而且更奇怪嘅係,班主持人仲會質疑,現任區議員成日批評政府云云,但區議會嘅定位同職責就係做地區諮詢組織,如果抗疫措施或執行上有問題,當然要如實反映比當局知道,咁樣又有咩問題?倒返轉講,如果區議員係成日讚揚政府嘅話,主持人咪又會質疑係想「刷鞋」,所以根本就係無嘢攞嘢嚟講,都晒氣嘅!


講到底,抗疫係要全港市民參與,就算無咗班反對派區議員都好,其他現任區議員、政黨同其他地區組織都會自動補位,無必要將反對派哋睇得太重。其實,即使係被DQ咗嘅反對派只要有心,一樣可以繼續做義工為地區服務,問題係佢哋願唔願意?囍雨唔係話要針對個別電台主持人,但係做傳媒人就要理性中立,偏幫反對派幫到咁樣,真係有小小肉酸囉。


原圖:星島日報

請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

14
好正
1
心心眼
2
好好笑
1
令人傷心
1
嬲爆

評論

  • +85298****49
    +85298****49
    2年前
    0 回應 檢舉
    Excellent
    • +85298****49
      +85298****49
      2年前
      0 回應 檢舉
      Excellent

      沒有更多評論

      沒有更多評論