大家應該聽過咩叫「現眼報」，但真實生活，大家又見過真實版「現眼報」未呢？話說加拿大首都渥太華跨境貨車司機抗議政府強制接種疫苗示威已經踏入第11日，早前已經確診新冠病毒的總理杜魯多就話，示威活動應該停止，又批評少部分示威者叫囂同揮舞納粹旗嘅做法，唔配做加拿大人喎。嗱嗱嗱，講明先呀，囍雨唔係認同示威者嘅手法，所謂「現眼報」亦唔係因為杜魯多確診新冠病毒，囍雨只係覺得佢「打倒昨日的我」嘅言行非常滑稽兼肉酸之嘛。

杜魯多公然支持暴徒

大家仲記唔記得，杜魯多2019年喺香港反修例暴動期間講咩呀？佢話喎，中國政府應要十分小心處理抗議活動，以回應港人的「合理訴求」。咦，咁點解今次加拿大政府冇去「十分小心處理抗議活動」，以回應加拿大人「合理訴求」嘅？唔通杜魯多完全唔記得自己講過乜？

加拿大今次示威，老實講，比起香港2019年反修例暴動就濕碎啦，2019年香港班暴徒，見到異見者就打，連女人同長者都唔放過、見到港鐵同交通燈就整壞、見到中資機構同商戶就打砸燒，仲用腐蝕性液體去攻擊警察，同向反對暴力嘅普通市民淋易燃液體，再點火燒添；仲有仲有，班暴徒見唔係自己人就針對，仲用磚頭掟死清潔工羅伯添，乜今日加拿大有呢類事發生咩？冇囉，咁杜魯多又做咩咁激動呀？

身為首相 雙重標準

如果話班示威者叫囂同揮舞納粹旗嘅做法，令杜魯多本人好睇唔過眼的話，咁就仲難明。2019年香港反修例暴動，班暴徒都係見人講普通話就打，仲擺明係針對所有來自內地嘅人添，當日出街真係講廣東話有口音都怕畀人打到殘廢呀，呢啲族內歧視行為，放喺今日加拿大都不能接受啦，當日杜魯多又點解要企喺暴徒一邊先？

講到尾，加拿大政府乜唔係好支持「言論自由」同「表達自由」嘅咩？加拿大班示威者今日啲行為，套用杜魯多對香港反修例暴動嘅標準，都係言論同表達自由之嘛，有乜理由就咁要同人割席喎，仲以為加拿大政府同杜魯多「核爆都唔割」，原來當問題發生喺自己國家或者牽涉到自身利益嘅時候，杜魯多就會突然明白到，「言論自由」同「表達自由」其實都唔係絕對權利呢樣咁基本嘅常識？

只係識跟美國走

杜魯多，好心啦，你作為一個獨立主權國家領導人，好心就唔好再對美國千依百順，永遠跟住美國尾巴行啦。雖然全球都知，加拿大係美國「細佬」、事事都以美國馬首是瞻，但你作為一個正常人，做事同說話都應該要公公道道，對自己國家示威者就咁嚴厲、對香港暴徒就學人玩縱容同寬容，小心遲早畀人同你玩割席，到時就真係「現眼報2.0」喇！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk