今日最新一份《施政報告》終於出爐，全文共十個章節約3.4萬字。當中除咗有港人非常關心嘅房屋新政策、融合國家發展大局嘅措施之外，仲有一點值得大家留意，就係喺維護國家安全方面，特首表明，將會積極推展《基本法》第二十三條嘅立法工作，而政務司司長將統籌檢視或激活現有法例，聚焦嘅議題包括打擊假新聞同保障網絡安全等。其實，無論係二十三條立法，定係打擊假新聞都好，其實社會都討論咗好耐，雖然暫時未知道草案詳情，但係大方向都係值得支持，應該盡快去做。

二十三條或規管煽動仇恨行為

相信大家都知道，《基本法》二十三條立法係特區政府嘅憲制責任， 一定要做。就算香港已經實施《港區國安法》都好，但呢個只係維護國家嘅其中一步，而《國安法》本身亦唔等於可以取代二十三條。至於二十三條立法草案，政府暫時仲未公布，但係之前保安局局長鄧炳強就透露過，會研究將《刑事罪行條例》中嘅「煽動罪」加入二十三條範圍。囍雨估計，將來亦會循「煽動」方向規管假新聞，而保障網絡安全等規範亦會併入二十三條立法一併去做。如果真係咁，囍雨真係舉腳支持！

大家應該仲記得，2019嘅反修例暴動中，有好多人利用假消息、假新聞，編造出一個又一個黑暴謊言，咩「831太子站警察打死人」、「新屋嶺性侵事件」，煽動港人去向政府同警方「報仇」，激發連串暴力示威。有前車可鑑，仲點能夠坐視不理？煽動仇恨會帶嚟幾大嘅危害，大家都親身體會過，政府必須防患於未然，阻止同類事件再發生。

無損言論及新聞自由

不過囍雨都知道，當局有意立法打擊假新聞，實會有人衝出嚟批評，話法例可能會影響言論同新聞自由云云。但係囍雨想講，大家要先搞清楚一件事，「報錯新聞」同「造假新聞」係完全唔同嘅概念，兩者嘅動機完全唔同，後者係帶有惡意，甚至係為咗危害國家安全而去做。故此，即使日後有反假新聞法，喺普通法制之下，控方需要證明被告有不良或危害國安嘅動機，仲要係無合理疑點之下，先可以成功入罪，門檻可謂相當之高。大家享有嘅合法權利同自由，絕對唔會有影響。

必須保障網絡及數據安全

另外，當局提到會保障網絡安全，呢樣嘢喺現今社會，真係相當之重要。依家科技一日千里，如果想癱瘓一個城市嘅公共設施，好似電力、食水、通訊服務供應等，其實唔需要親自走去放炸彈炸毀設施，只要透過網絡攻擊，就可以令到呢啲設施停運。囍雨相信，將來政府立法嗰陣，可能會有條文要求公共設施嘅營運者，規定要符合一定保安水平，防範受網絡攻擊或資料外洩等，確保設施不受干擾或破壞。但係其實咁樣都未必足夠。

想全面維護網路安全，其實仲要設立一套機制，處理大數據同核心數據嘅保安問題。不少通訊及網絡工具營運商，都會將伺服器放喺外國，執法部門想問佢哋拎資料查案，往往都要經過重重難關，甚至係不得要領。將來政府可以考慮，要求平台如果喺香港提供服務，就必須將數據保存喺本地，並且喺有需要時供執法人員查閱。其實網絡或數據安全法，喺國際社會都好普遍，就好似新加坡國會早幾日就通過咗《防止外來干預法》，加強政府打擊外國干預力量通過「敵意資訊運動」同「本土代理人」干涉當地政治。加強對網絡平台嘅監管，已經係世界大勢所趨。

既然政府依家講明要就二十三條立法、打擊假新聞等，似乎係見到漏洞所在，要設法填補。所以囍雨就覺得，相關立法、檢視程序真係要盡快做，只要能夠更好咁維護國家安全，保障香港社會穩定，先至係市民大眾之福。

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk