「我衰咗三年，我等一個機會，爭返口氣，唔係要證明話俾人聽我威，只係想話俾人聽，我唔見咗嘅野我想自己攞返」、「阿SIR，我無做大佬好耐喇」… 呢排廣男上網聽歌，不經意地經常聽到張國榮主唱嘅《當年情》，然後又不經意地睇多次堪稱港產片經典嘅《英雄本色》。以前嘅港產片，代表住香港文化最鼎盛嘅年代，香港電影呢個文化創意產業，喺亞洲而言絕對「屈機」；廣男喺度諗，我哋係咪有啲文化優勢正在消逝，需要重新建立起我哋嘅文化，甚至成為中外文化藝術交流中心呢？

香港需要文化局

噚日，全國政協副主席、前特首梁振英喺社交媒體發帖，提到香港有燦爛嘅中華文化，亦有獨特嘅、中外複合嘅次文化，所以香港嘅文化事業同文化產業都有大幅發展、提升同復興嘅條件；而香港要成為「十四五規劃」中嘅「中外文化藝術交流中心」，特區政府嘅作用唔單止係投放更多資源，而係要有職能權責清晰嘅政策局，負責制定發展策略同統籌協調相關政策措施。所以，梁振英喺2012年候任行政長官期間，已經提出要成立文化局；可惜嘅係，成立文化局嘅動議被立法會嘅反對派「拉布」拉死，轉眼九年，唔少黃金機遇變成錯失機遇。

文化藝術，係一個看似簡單、其實包涵甚豐嘅範疇，就如廣男喺文章開首講嘅電影，屬於香港文化嘅一部分；大家平時去唔同博物館以至藝術館睇展品，亦係文化藝術嘅一種；甚至大家聽廣東歌，或者依家睇年輕男團表演，都屬於相關範疇。坦白講，基於香港長年受到中西文化嘅薰陶，廣男覺得香港要發展文化事業嘅底子非常強，問題只在於，到底我哋係要「小政府，大市場」，任由市場「自由發展」，定係政府成立專局去推動相關事宜呢？

文化亦關乎經濟

必須強調，搞文化藝術，絕對唔係「得閒搵嘢嚟做」，例如電影、電視、音樂以至舞台表演等，如果搞得好，可以養活好多香港人，仲可以推廣香港，吸引旅客嚟香港；又或者，例如文化藝術等展覽搞得成功，成為咗香港嘅標誌（如Art Basel），多啲人嚟香港參觀、交流，咁亦係為香港經濟注入活水。所以，文化藝術工作如果做得到位，最後對經濟都有利。

現時文化政策散落喺唔同政策局上，當個個都「可以管」嘅時候，其實亦即係「無人管」！文化事業與創意產業，就如一個錢幣嘅「一體兩面」，以前視香港演藝界人士為偶像嘅韓國人，依家喺相關產業已經做得出類拔萃，香港呢個曾經傲視亞洲嘅「老大哥」，解決好政治問題，係時候處理好其他事項，文化藝術工作，絕對唔應該被忽視。

原圖：rthk、旅發局網頁、中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk