中央要完善香港嘅選舉制度，確保愛國者治港，外界尤其關注反對派政客將來參唔參選，以及有咩政客觸及「DQ線」唔可以參選。廣男留意到，教育界前立法會議員葉建源稱暫時仍抱觀望態度，目前「難以斷言」會否再參選，須待實際方案公布再檢視，但係認為無論如何，選舉制度都會面臨相當「大倒退」。廣男又唔明，既然覺得選舉制度「倒退」，咁仲參選？即係選舉制度如何唔緊要，最緊要係自己或者教協嘅「自己友」仲有得玩？

傷心又難過嘅政客

對於反對派政客被檢控同起訴，葉建源感到好痛心同難過，認為情況「不應該是這樣」，又指「民主派」面對嘅困難亦已經唔係選舉制度嘅問題云云。對於葉建源嘅「觀望態度」，擺明係想為自己或者教協留後路，就連全國政協副主席梁振英都喺社交媒體回應，預料葉建源等人唔會唔參選，新嘅立法會「不愁沒有反對派」。

反對派政客有時可能口裡說不，但身體往往先係「最誠實」，大家試想下，中央要完善選舉制度確立「愛國者治港」原則，明明係對香港好，點解反對派政客一邊要批評係「倒退」，一邊又唔講自己「拒絕參選」呢？即係佢哋反對一樣嘢，但又參與果樣嘢引申出嚟嘅各種體制、架構？唔好俾廣男講中，葉建源所屬嘅教協「盤踞」咗立法會教育界嘅議席咁多年，唔會咁容易放手；又或者，就算葉建源自己唔選，教協都會派其他代表參選，期望「永續議席」。

左搖右擺 不如去賣菠蘿

之前反修例運動搞到香港立立亂，又不斷出現失德教師，教協一方面無明顯地同暴徒「割席」，一方面又出盡全力支持失德教師，可以話係反中亂港嘅「禍港者」；依家《港區國安法》已經實施，中央又會完善香港選舉制度，在社會以至在議會，教協都難再有禍港空間。既然係咁，教協係咪需要轉型？

問題嚟喇，咁如果教協轉型，做咩好？答案就係賣水果！據傳媒報道，台灣鳳梨（香港人叫開菠蘿）近期成為「搶手貨」，本身有超市嘅教協知道好多會員想買，於是盡力搜「蘿」，點知推出訂購後，會員反應熱烈，首批貨被訂購一空，連教協理事都訂唔到；教協見反應咁熱烈，就即刻聯絡供應商「拎多啲貨」，務求會員「開心」。政治搞唔掂，教協會唔會考慮以後專心做超市，努力賣水果呢？ 

圖片來源：中通社、教協

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk