反對派政客講嘢，你會信幾多？有人相信佢哋違法「佔中」嘅概念，結果香港被搞亂近80日，民主進程毫無進展；有人相信佢哋嘅「五大訴求」，結果反修例風波過去，只有過萬人被捕，更令中央訂立《港區國安法》。依家反對派政客以至KOL有個新倡議，就係「BNO可助港人逃生」，囍雨上網睇新聞，見到民主黨國際事務委員會主席劉慧卿撰文，話好多家長歡迎BNO呢條「逃生」路線，希望給予孩子一個自由、安全和穩定嘅未來（Many anxious parents particularly welcome this escape route, which they hope could give their children a free, safe and stable future）。囍雨就覺得，去英國係咪真係咁「美好」呢？未必囉！
充滿歧視的西方國家
囍雨姑且唔講所謂「自由」嘅問題，劉慧卿或者一啲香港家長可能認為英國安全，囍雨曾經睇過新聞，英國各地就出現過專門針對華人同中餐館嘅罪案，有人更表示英國華人家庭或已經成為匪徒針對嘅目標。囍雨唔敢講話英國一定「唔安全」，不過喺疫情底下，英國經濟每況愈下，罪案會唔會更多，華人係咪賊人「目標」，真係值得商榷。
除咗安全問題，囍雨仲想講，香港人覺得英國「歡迎」香港人，但事實又係咪咁呢？囍雨相信近期大家已經上網睇過好多討論，有啲人未入境，就已經俾英國嘅入境人員冷待；囍雨聽過最離奇嘅故事，甚至係有人入境時因為「影相」而被拒絕入境。香港、內地本為一家，但香港人都會反對內地居港人士，而英國人同香港人係兩個「人種」，難道有人會真心認為英國人會好歡迎香港人去英國？
為何中央不可反制
劉慧卿近日頻頻為BNO問題發聲，囍雨覺得市民再相信呢啲反對派政客，同信佢哋「佔中可爭取民主」、「反政府可爭取五大訴求」無乜分別，一樣係「相信了」，然後「中招了」；劉慧卿喺文章表示希望中央唔好採取行動（I hope Beijing will not take actions to harm the interest of Hong Kong people），事實係如果英國堅持俾持有BNO人士借簽證移居英國，中央勢必反制，最壞結果係持BNO移英人士喺英國生活唔到，而佢哋嘅中國籍、香港永久居民身份又失去，兩頭唔到岸。不斷吹墟BNO、叫中央唔好行動嘅政客，點解唔話俾香港人知道，佢哋借BNO移英，最後可能會得不償失呢？
老實講，如果係反對派有頭有面嘅政客移居英國，佢哋會得到外國勢力嘅「悉心照顧」，但香港絕大部分嘅人都唔會得到呢種待遇，打算賣車賣樓到英國，然後去餐廳做洗碗工、去超級市場做侍應？呢啲係個人自由，不過香港一波波嘅移民潮話俾我哋知，通常留低嘅先係贏家。
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論