自從新一屆區議員喺上一年呢個時候上任，有關不同區議會嘅醜聞就不絕於耳，唱「獨歌」、越權、侮辱警方以至官員，唔少人都質疑，既然區議會以至部分區議員已經完全「變質」，點解仲要用公帑俾佢哋「反中亂港」？日前，民政事務局局長徐英偉直指「區議會已經失效」，表示將檢討區議會嘅工作，並適時公布處理方案。廣男覺得，處理搞事、越權甚至「播獨」嘅區議員，政府處理唔駛急，但最緊要快！

曾呼籲區議員「跟規矩」

對於區議員嘅「失德」問題，引嚟唔少立法會議員指摘，例如梁志祥就批評部分區議員公然違法，又將議員辦事處用作「民主派初選」嘅票站；周浩鼎就指部分區議員不務正業，更涉違反《港區國安法》，應盡早離開崗位。徐英偉就回應，原來佢曾嘗試呼籲區議員跟從規矩但不被理會，並認為區議會已經「失效」。

廣男想講，作為特區嘅區議員，效忠特區、擁護《基本法》係根本條件，但一年時間過去，一班喺區議會高唱「獨歌」嘅區議員，今日依然係區議員；喺《港區國安法》生效後仲喺辦事處掛「港獨」旗嘅區議員，似乎仲係「安坐其位」。如果政府要推出措施處理已經「失效」嘅區議會，宜快不宜遲。

林林總總的「惡行」

如果大家仲有印象，有一段時間有為數唔多嘅區議員，都宣稱唔服務部分「政見不同」嘅居民，廣男覺得，區議員嘅職責，本來就係服務「所有區內」街坊，呢啲區議員，係咪又要處理呢？更為重要嘅係，過去一年嘅區議會已經完全變成政治角力場，政府再容許下去，係咪即係俾錢、俾場地「反中亂港」嘅政客做政治騷？

最後，廣男必須強調，佢哋喺區議會搞事，可能由傳媒報道再將不同嘅抗爭訊息散播開去，但係佢哋作為「紮根地區」、享用緊公帑嘅議員，佢哋每日可以接觸到好多居民，如果俾佢哋繼續散播歪風，甚至用「獨」思想荼毒居民，後果絕對係不堪設想。有人話，應該將「有問題」區議員統統DQ，大家又點睇呢？ 

圖片來源：劉家衡Facebook、黃文萱Facbook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk