今日警察清除金鐘障礙物，受到阻撓既情形出乎意外地少，順利既程度令到廣男都有啲吃驚。咁順利，梗係有啲理由既！怕畀警察整傷，未必。歸根究底，其實係有好多佔領者走咗，即係無「找數」！

繼「佔中」三子「萬人自首」變「三兩友」後，公民抗命最後一個、亦都係最重要一個動作，就係自首、等待被捕或者伏法；如果根據佔領行動既理念，無一萬都有幾千人留低喺金鐘等被捕，結果只係得百幾人，當初講好以法達義，而家變成走得快、好世界。

必須澄清，無人想被捕，無人想有案底，係人之常情。唔想找數，唔緊要！但清場前傳媒問佔領者會唔會留到最後一刻，有唔少都話自己為民主、為公義，會留守到最後，直至被捕。一邊話人不義，一邊扮正義，但之後走數，呢種行為都唔值得表揚啫！

唔找數、唔想找數或者從來都無諗過找數，都算喇！警察今日清咗場，今晚、聽晚、同後晚，一定會有唔少前佔領者會重臨金鐘或者旺角，到時可能又會起衝突，到時係咪又要衝擊，又唔找數呢？

如果唔想被捕，其實最好既方法，就係唔再走出嚟參與佔領、衝擊行為，咁做唔係剩係為政府、警察或者社會好，都係為自己好。除咗免被捕既風險，都係保障自身安全既最好方法。

佔領者唔係聖人，要「以法達義」當然唔容易；佔領者亦都唔係英雄，唔駛犧牲自己成大義；但世事無兩全其美，好難又威又帶頭盔，如果唔想被捕，就唔好攞自己前程、安危「教飛」喇！