壹傳媒老闆黎智英鍾意搞政治、反中亂港，大家都知；原來佢仲有好多「不務正業」嘅劣行！近日網媒《港人講地》踢爆，懷疑《蘋果日報》喺佢位於將軍澳工業區嘅辦公地方、即係《蘋果日報》總部搞「私幫生意」，有公司涉嫌喺《蘋果日報》地址經營為其他公司提供「公司秘書」嘅服務，經傳媒踢爆後有關公司即急急「搬竇」。囍雨好奇，黎智英等人有冇違反地契條款？如果查證屬實，係咪要重罰，甚至收回佢將軍澳工業區土地？
詭異的「公司秘書」服務
簡單而言，呢單嘢就係《蘋果日報》喺將軍澳工業邨嘅總部土地，係以極優惠地價批出嚟嘅，涉及大量公帑補貼，所以如果違反地契條款，搞指定業務以外嘅其他生意，不但涉嫌違規，仲可能導致公帑損失（政府補貼你，你做其他嘢？）；吊詭嘅係，當有網媒向管理將軍澳工業邨嘅科技園查詢時，科技園未回覆，嗰間提供「公司秘書」服務嘅公司「力高顧問有限公司」就搬走咗去灣仔，而科技園之後就回覆網媒指「加以了解，如發現違規行為，會採取適當行動」。件事到底發展成點，必須要繼續追查落去！
對於黎智英等人涉嫌違規或者違反地契一事，囍雨實在充滿問號。首先，間提供「公司秘書」服務嘅公司喺1988年2月成立，至今超過30年，到底呢間公司進駐咗《蘋果日報》總社幾耐？如果係一段相當長嘅時間，點解一直無人跟進有無不可告人內情？懷疑違反地契嘅問題？網媒呢頭做調查報道，間公司轉頭就「搬走」，又有冇古怪？
必須嚴肅調查
講真，公司搬走咗，係一回事；黎智英及《蘋果日報》有冇曾經涉嫌違規，係另一件事！就算間提供「公司秘書」服務嘅公司搬走咗，而查證到相關人事確實曾經違規，一樣係「犯法」，一樣要追究落去！據報，對於喺工業區違規，尤其係違反地契條款嘅懲處，一般而言可能係罰款了事，但囍雨要點出，如果黎智英及《蘋果日報》係長期違反地契，咁仲應該係罰佢錢？定係要考慮同《蘋果日報》終止契約收回土地，將佢「踢出」工業區呢？問題真係好多，但科學園應該秉公處理，唔好因為《蘋果日報》「惡」而怕咗佢！其實，立法會建築、測量、都市規劃及園境界議員謝偉銓都指出，如果違反批地條款，最嚴重係可以收回土地，但現時違規阻嚇力不理想，就算涉事者更正錯誤，亦應該重罰。今次黎智英涉嫌違規，如果因為佢係「反政府報章嘅老闆」而唔執法，就實在太無天理！
早前，《蘋果日報》創辦人黎智英就因為涉嫌「組織及參與未經批准集結」而被捕，依家連《蘋果日報》總部都「出問題」，到底黎智英同壹傳媒仲有幾個問題「冚住」？呢樣嘢真係要靠媒體繼續發掘，市民繼續關注。
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論