繼中大之後，理大一帶噚日亦都爆發激烈「戰事」。黑衣暴徒連日佔據理大校園同連接港鐵紅勘站嘅行人、行車天橋，大肆破壞、縱火，癱瘓紅隧交通；噚日防暴警到場執法，暴徒又以大量汽油彈、弓箭、磚塊等致命武器進行密集式反抗，雙方激烈「攻防」由朝早持續到夜晚、並通宵對峙。期間，有警員腿部中箭受傷、有警方防暴車中汽油彈起火、附近行人天橋更一度陷入火海幾乎燒通頂。廣男認為，暴徒行為已經嚴重威脅到現場無論係學生、記者、警察甚至佢哋自己嘅生命安全；當有人聲稱警察「攻入」學校、「圍攻學生」之時，大家應該先睇清，警察執法嘅「前傳」，係有暴徒佔據要塞、恐襲交通命脈，更加罔顧他人性命。
警員中箭 警車中彈
其實由噚日朝早開始，一批喺理大附近清理路障嘅市民就被逾百「唔順氣」嘅黑衣人以汽油彈「招呼、警告」；其後警方到場，暴徒又近距離向警員、水砲車、裝甲車發起一波波汽油彈攻勢；同一時間，有暴徒利用理大平台嘅高處地勢，以巨型彈叉向路面警方發射汽油彈，又有人列陣拉弓亂箭齊射，一名喺現場執勤嘅警員腿部中箭，箭頭幾乎貫穿小腿而出。入夜後，暴徒又喺連接理大嘅行人天橋焚燒雜物，傳出多下爆炸聲，火勢更一度上下蔓延幾乎焚毀成條橋。晚間約九點，暴徒喺暢運道行車天橋向一架警方防暴車施以密集式「投彈」，導致車身起火焚燒，車上警員即時倒車退回防線。
暴徒以石油氣罐製「炸彈」
廣男認為，暴徒嘅危險行徑只可以用「失控、瘋狂」嚟形容，暴力程度基本上同恐怖分子冇乜分別，有媒體估計，過去一兩日，佢哋已經投擲咗成千枚汽油彈，但原來除此之外，據報校園內仲囤放咗大量備用汽油彈同易燃易爆危險品，以及弓箭、磚頭、鋼珠等可致命武器，尤其甚者，廣男睇到網上相片，顯示有暴徒以鐵釘捆綁石油氣罐，製成大殺傷力「炸彈」，大家可以想像，如果呢啲「軍備」付諸使用，傷亡隨時數以百計。所以當有政客、人士又不斷怪罪警方「圍攻學生」時，廣男都要反問，呢啲人又有冇睇到暴徒縱火、破壞、癱瘓交通、以汽油彈甚至「土製炸彈」搞暴動嘅事實「前傳」呢？
校方、老師繼續縱暴？
另一個問題係，危機當前，校方、老師、管理層又為「和平解決事件」做過咩有建設性嘅事情呢？新聞話理大校長滕錦光噚晚通過視像「呼籲學生離開」，但大家要質問，由一開始，校方有冇告知學生唔可以佔校堵路？喺校內製造、囤積危險品可能隨時造成大量傷亡？又有冇譴責過學生暴徒縱火、破壞、襲警等暴動行為？廣男就唔覺有！當校方不作為，危害至少有兩大方面，一係令參與違法嘅學生認為覺得自己係有人「支持、保護」嘅「英雄」，更可能因此變得更激進；二係令其他意圖犯法嘅學生有樣學樣，視校園為庇護所，從而不斷喺唔同校園「複製」中大、理大嘅「戰事」。廣男喺度想大家明白一點，當有人犯法，執法就係警方嘅責任，但唔好俾學生繼續錯落去，就係校方同社會都有責任。有啲危害，如果唔防患於未然，隨時後患無窮！
原圖：文匯報
請Follow我們的YouTube頻道：
下載我們的手機應用程式，收看第一手精彩內容：
評論