老婆：「老公，有套叫《男人唔可以窮》既戲上咗畫喎，睇唔睇呀？」

廣男：「哦，呢套咪同《紅VAN》一樣，都係出自《高登》嘅戲囉！」

老婆：「吓，咁會唔會好爛架？」

廣男：「無所謂啦，當消遣啫，去睇下囉！」

於是，廣男同老婆就懷住「預咗」失望嘅心情，買飛入場睇《男人唔可以窮》。世事往往都係出人意表，有啲戲，你以為佢會好好睇，點知就爛到飛起；有啲呢，你預咗未必好睇，結果反而相當唔錯，《男人唔可以窮》就係一例。

雖然，《男人唔可以窮》既劇情唔可以話相當精彩，但比起一般港產片，劇情都算流暢、緊湊。故事講述男主角薛可正走投無路之下做咗倫敦金經紀，由一個好「窮」嘅文員，變成一個搵到兩個錢嘅經紀。電影中後段，主要就講佢同老豆、前女友，以及新女友嘅故事。

以為《男人唔可以窮》呢套戲係講一個「窮」男人變成「有錢」男人，從此改變命運，事業、愛情、家庭三得意嘅話，呢個諗法真係大錯特錯（廣男入場前都係咁諗）。反而，故事想帶出嘅訊息，係如果一個男人本身既問題諸如性格、待人接物唔改變，就算有咗錢，生活都唔一定好，日子都未必會過得開心。

所謂嘅「窮」，並唔係指有冇錢，而係「內心貧乏」。當男主角薛可正變得比較有錢，以為可以要風得風嘅時候，身邊嘅人話佢聽「NO！」有錢，但如果錢唔係取之於正途，就算畀多啲錢屋企人，屋企人都未必開心；有錢，以為女友、前女友都要賣佢帳，答案一樣係「NO！」，呢個世界有拜金女子，但講心唔講金嘅，一樣有！

男主角老豆係由老戲骨廖啓智飾演，佢一句對白幾乎就講出一個男人應該有嘅原則，「唔係自己嘅野唔好攞，係自己嘅嘢就做番好佢。」男人，的確唔可以窮！但所謂嘅「唔可以窮」，其實係講緊男人應該有腰骨、有尊嚴、有人格先真！

原圖：hk.movies.yahoo (電影劇照)