過去兩星期，香港發生咗好多令人唔開心嘅事，喺反《逃犯條例》修訂集會期間，示威者同警察發生嚴重衝突，兩者皆傷之餘，唔少年輕人亦因事件被捕，相信好多香港人都感到心碎。廣男唔係示威者，亦唔係警察，但眼見本來唔係對立嘅雙方因為修例問題而劍拔弩張，不斷撕裂，心入面不斷疑問，係咪仲要對立落去，令更多人受傷？「一人讓一步」呢句說話係好老土，但確實係廣男而家心中所想。

由遊行開始 到流血收場

打從民陣發起6月9日嘅反修例遊行開始，廣男就一直留意住相關新聞，去到6月10日零晨嘅衝突，6月12日更加大型嘅衝擊，廣男都有留意。喺6月10日零晨，的確係發生過衝擊、襲警等場面；至於6月12日，暴力衝突更加係全面升級，示威者有掟磚、掟鐵枝等，警察亦係有使用武力回應，結果流血收場。真係大家都唔想見到！

我哋嘅社會，我哋嘅香港，已經因為今次事件而陷入「無盡嘅撕裂」，撕裂情況可以話係比2014年「佔中」果時撕裂得更犀利。之所以認為今次嘅撕裂係「無盡」，係因為今次事件帶嚟嘅撕裂，已經唔係單單係示威者對政府或者示威者對警察。警員因為今次衝突，受到全方位「敵視」；而支持示威行動嘅學生，亦有受到其他人例如商戶嘅抵制。如果情況惡化落去，恐怕就係「你唔妥我」、「我唔妥你」、「佢又唔妥我」、「我又唔妥番佢」，香港人永遠都有「唔同敵人」，社會和諧唔可能再出現，社會要穩定就更加難。

停止對抗「埋枱傾」

老實講，當有啲人要鼓吹示威者繼續行出嚟，繼續搞對抗嘅時候，廣男絕對唔贊成，如果係和平示威、合法集會，冇問題，但如果係涉及堵路、衝擊以至其他違法抗爭手段，咁就算今日唔出「意外」，只怕唔知幾時又會再起衝突，又唔知幾多人受傷，幾多人被捕。喺呢度，廣男呼籲各位愛香港嘅人，如果要表達政治訴求，遊行、集會絕對可以，但最重要係合法守法，唔好再叫人將行動升級，以暴力解決問題。因為當激進行動再出現，無人會「贏」，只會有更多人受傷，更多人被捕，然後唔同人之間又會不斷撕裂，最後香港會變成點，真係唔敢想像！

原圖：大公報