喺特區政府提出「優化版」《逃犯條例》修訂建議之後，廣男發覺，前日喺網上出現咗一個「新移民反修例」嘅《聯署聲明》。據媒體報道，呢個所謂聯署嘅發起人，包括網媒前總編輯、教大講師及導演等。但據廣男所知，呢幾位發起人，一係自己本身就係盲反派人士，一係就係同盲反派、甚至「佔中」罪犯好「親近」，真係好令人懷疑，所謂「新移民聯署」，係咪又係一班盲反派政客喺背後搞事呢？而廣男覺得最離奇嘅係，盲反派唔係一向好歧視、甚至敵視新移民嘅咩？依家為咗反修例，好似突然又覺得新移民「好有價值」喎。

果個名為「一群在港大陸新移民反對《逃犯條例》修訂聯署聲明」講乜，廣男就唔想喺度複述喇，其實講嚟講去，不外乎繼續妖魔化修例、聲討特區政府，以至攻擊內地司法制度、中央政府等等，然後呼籲新移民參加嚟緊嘅遊行同「之後一切必要的抗爭」云云。廣男睇到，最新嘅「聯署」人數係322人（網站聲稱「不斷更新」）。嘩！三百幾人就標榜「新移民反修例」？廣男翻查公開資料，由九七回歸到依家，新移民加加埋埋超過有一百萬人，如果三、五百人搞個簽名，就話代表咗新移民，係咪誤導人呢？

英文字母式簽名聯署

至於「聯署」嘅呢三百幾人，廣男睇番個名單，就發覺其中唔少人自稱「在香港出生」、「非大陸新移民」，有啲就有「姓」冇名，有啲就仲誇張，得個英文字母，咁又叫「簽名、聯署」？！聯想到近日唔少學生、家長、甚至知名人士都出嚟指證有人「冒簽名」、澄清自己「被聯署」，對於呢份「新移民聯署」嘅真確性係咪信得過，或者內裡有幾多係「冒簽」，就見仁見智，總之廣男就覺得完全唔可信啦！尤其是，當大家見到啲盲反派媒體係咁宣稱有幾多人聯署反修例時，大家自然明白其中有幾多「水分」、有幾以偏概全。

盲反派一向歧視新移民

廣男覺得最過份嘅一點係，一直以嚟，班盲反派政客其實從未停止過歧視新移民，甚至以敵視嘅態度，將一啲社會問題降罪於新來港人士，一時發出「蝗蟲論」，一時話新移民佔用社會資源；據報道，公民黨立法會議員楊岳橋今年一月甚至曾發起專門針對新移民嘅動議，攻擊佢哋「搶奪」香港人福利。但當盲反派依家要大力圍剿修訂《逃犯條例》之時，又突然間臉色一轉，當新移民係「自己友」咁款，借佢哋發聲搞對抗。呢種「平日踩、用時捧」嘅嘴臉，大家又可唔可以接受呢？「神又係你，鬼又係你」，盲反派當班新移民係咩呢？

圖片來源：網絡