無綫實習記者日前成功訪問到地政總署助理署長林嘉芬，惹嚟造新聞既疑雲，當中又以講嘢只靠「百分百感覺」出名既壹傳媒主持李慧玲嘈得最大聲，話無綫做新聞「維穩」，又話如果無綫營造一個林嘉芬愛田園既感覺出嚟，就係造假，涉及公眾利益等等。有乜憑據？話明「百分百感覺」，梗係冇啦！

李慧玲講到似層層，如果唔細心分析，真係會畀佢呃到。原因好簡單，如果無綫真係同林嘉芬夾新聞，呢單獨家大猛料，隨時會幫無綫跑贏晒其他電子、平面媒體，做硬頭條；咁大單新聞，無綫派個實習記者去咪好大風險？萬一出事點算？如果學李慧玲咁講，要造新聞，一定派個資深記者去啫，反正夾好晒，打爛沙盤問到篤都得啦！

通常咩新聞會派實習記者去？咪就係好可能得個桔，但又要跑又要曬既新聞囉！所以話無綫造新聞，其實唔合理，而且據講，唔少無綫記者睇到李慧玲有咁既評論，都忿忿不平，紛紛透過唔同渠道反駁呢個失實評論，至於係唔係真，讀者就自己發掘吓喇。

李慧玲亂吹既能力已經達到化境，隨便就可以將自己既推論變成一個故仔，然後用一個故仔變成一種指控，再利用指控變成輿論公審，黎智英請李慧玲入壹傳媒，真係好符合壹傳媒既風格。

話時話，早排爆出黎智英獻金風波，李慧玲喺自己個節目度「獨家」訪問到肥老闆，大好機會，平時既佢一定窮追猛打、咬住唔放，不過可惜吖，大家真係高估咗佢。原來李小姐對住自己老闆都一樣「純如小綿羊」，乖到不得了，問兩句幾肥老闆唔LIKE，即刻收聲，唔單止霸氣無晒、「正義感」失蹤，就連質詢同追問都唔多覺。

黎智英捐錢單嘢可能涉及違反選舉條例、立法會申報守則甚至報稅既法律問題，咁大件關乎公眾利益既事李慧玲竟然用咁維穩既方法處理，講維穩邊度有人及得上李慧玲呢？查實講作新聞，《蘋果日報》先係佼佼者，當年陳健康事件，陳健康收《蘋果日報》記者5000元報酬，對方拍攝北上尋歡相片，仲做埋報紙既獨家頭條新聞，呢啲先係就真係造新聞喇！造新聞呢三個字出自壹傳媒、李慧玲把口，特別有「公信力」！

原圖：網絡圖片