一段4年前既朗誦片段，令學生梁逸峰一夜之間「爆紅」。佢唔係明星、歌星受歡迎果隻紅，係俾人批評、恥笑果隻「紅」；面對網絡欺凌，梁同學勇敢行出黎，再加一句「從無生氣，歡迎理性討論」，將指責輕輕化解，令到批評、欺凌佢既人相形見絀。

你問廣男有冇睇過梁逸峰條片、有冇笑過，廣男老實答你有睇過、有笑過，但廣男從無喺網絡上留過一個留言、無將影片分享出去，亦無攞將事件作為茶餘飯後的談論「笑話」。原因好簡單，梁同學既朗誦手法雖然有啲惹笑，但佢用自家一套方法朗誦，既無傷害人，又無做錯事，點解非要批鬥佢不可？

就算當批評、嘲笑梁逸峰係大家既自由，但係冒認梁逸峰開Facebook專頁發表文章，呢啲行為又為咩？係咪我地社會、網民已經唔滿足於停留喺批評、嘲諷、恥笑既階段，要進一步冒充當事人搗蛋，令到當事人萬劫不復先叫Perfect呢？廣男對此絕不苟同！

有人認為學朗誦無用，咁講其實喺網上訕笑其他人又有咩用？有網民表示當初笑梁同學朗誦既樣子，但梁同學既處事態度、逆向思維實在值得一讚；其實梁逸峰應對事件既方法，好值得我地學習，難怪梁媽媽大讚兒子生性。

面對群情洶湧既網上批評甚或欺凌，好多人會選擇逃避，就算道理喺自己手上，都會啞忍。但係呢種做法唔單止會助長歪風，仲會令更多人誤信網絡上既流言蜚語。面對網絡欺凌，要企出黎，向惡搞說不！話俾人知自己無錯，唔會嬲欺凌佢既人，但希望大家可以理性討論，我哋社會需要既係理性、務實既意見，純屬惡搞既聲音，於社會根本就冇益處。

原圖：mashable