民主黨立法會議員許智峯「涉」搶女政府人員手機，再攞埋人哋部手機入廁所慢慢「欣賞」，事件引起各方嘩然，就算許智峯本人同民主黨班「大哥」出嚟認錯同道歉都好，民憤明顯似仲未平息。囍雨呢兩日新聞，都發現盲反派仲有啲是非不分嘅人繼續護短，有啲就話許智峯行為不涉誠信，有啲就話許智峯係「可能技術上係犯法」；其實，盲反派為咗包庇許智峯，仲有啲咩係講唔到出口嘅呢？

盲反派包庇 歪理太「歪」

老實講，盲反派部份人士選擇包庇許智峯，囍雨都預咗架喇，好似之前南區區議員司馬文被揭發佢嘅西貢大宅僭建兼霸佔官地，明明錯到離晒譜，但盲反派班人一樣顧左右而言他，冇一個敢行出嚟講司馬文犯法兼誠信有問題，根本唔適合選立法會。今次許智峯嘅「搶劫案」，當然一樣有盲反派包庇佢啦，例如九西立法會議員毛孟靜就話「許智峯行為魯莽，但不涉誠信」，中大學者馬嶽就話「唔認為係咁大件事，可能（許智峯）技術上係犯法」，囍雨真係想問一句，佢哋知唔知自己講咩架？

先講毛孟靜嘅說法，係咪「不涉誠信」嘅行為，道咗歉就冇事呢？其實好多罪犯犯咗法畀人拉之後都認罪、認錯，佢哋一樣冇誠信問題架喎，咁係咪唔駛被罰甚至坐監呢？毛孟靜咁講，以後只要「不涉誠信」又肯道歉，真係「做乜」都得架喎，呢個講法實在恐怖！

至於立場一向反政府嘅中大政治學者馬嶽，可能佢知識根基比較深啦，所以諗到青許智峯「可能技術上係犯法」呢個辯解理由；但大家又要問喇，犯法就係犯法，咩叫技術上犯法？許智峯本身仲要係讀法律出身，所作所係明顯又係出於「故意」，馬嶽輕描淡寫講到好似只係打籃球時有人「技術犯規」咁，照佢咁講，下次如果有人因為「政治理由」而「搶劫」、「非禮」同「強姦」咁，能唔能夠話只係「技術上係犯法」，用心其實好善良呢？

盲反派「繼續吹」吧

其實，事情發展到呢個地步，囍雨覺得啲盲反派人士與其不斷為許智峯搵藉口，不如剩係話佢同民主黨都有道歉，叫大家考慮原諒許智峯啦。呢種搵藉口、甚至搵啲唔關事嘅建制派嚟攻擊嘅辯解方式，只會令人對許智峯更反感；認錯，就要坦誠，一邊話許智峯知錯，一邊又搵啲令人反感嘅藉口，咁市民憎多許智峯兩錢重，真係好正常！ 

原圖：RTHK