律政司司長鄭若驊、兩名選舉主任收到來自日本嘅恐嚇信，聲稱要殺死佢哋，又有建制議員收到恐嚇信要佢哋暗殺鄭若驊同選舉主任，實行「票債血償」，有收到恐嚇信嘅議員指恐嚇內容涉及煽動同謀殺，有如恐怖份子，對此予以強烈譴責。囍雨就覺得，無論政見幾唔同，或者對官員、議員有咩唔滿意都好，可以批評，但絕對唔應該恐嚇，執法部門一定要嚴肅處理；另一方面，囍雨非常「好奇」，一向「嫉惡如仇」嘅盲反派人士，佢哋見到咁嚴重嘅恐嚇事件，係咪應該出下聲呢？

無論如何 不應恐嚇

老實講，無論係DQ事件抑或其他政府官員嘅決定，唔同政見嘅人當然可以批評，甚至可以提出法律程序去反對，但係恐嚇行為就絕對唔能夠接受；今次有人恐嚇官員、議員，如果真係付諸行動，官員、議員咪好危險？對於囍雨嚟講，律政司、選舉主任DQ唔合資格參選嘅人，係根據法律行事，官員依法辦事但受到威嚇，係一件非常嚴重嘅事！

盲反派會否譴責恐嚇行為？

講開恐嚇事件，囍雨又記得立法會議員何君堯之前一句「殺無赦」，明明意思只係唔可以放過破壞香港嘅政棍，但係盲反派就群起而攻之，當時仲有22個盲反派議員發表聯署聲明，要強烈譴責何君堯言論。如今官員、建制議員被赤裸裸恐嚇，仲要講明係「票債血償」，呢班盲反派政客唔會當睇唔到呀？

如果囍雨無估計錯，盲反派好大機會扮睇唔到咩事，事關畀人恐嚇或者話嘅，唔係佢哋嘅自己友，佢哋唔會出聲之餘，分分鐘仲會「暗暗自喜」。囍雨覺得，如果盲反派班人真係咁疾惡如仇，不如行出嚟講兩句，話畀市民知，你哋係反對暴力，而唔係「事不關己，己不勞心」啦！

原圖：RTHK