農曆新年又嚟喇，廣男同好多香港人一樣，十分期待「收爐」、hea番幾日嘅「好日子」。同以前唔同，細個嘅時候好期待新年可以逗「利市」，而家就要派「利市」兼送禮；但其實年年新年都係一樣，廣男最怕嘅就係畀啲姨媽姑姐問長問短，拜年時間變成被「了解」時間，有時尷尬得嚟又唔可以「發圍」，其實都唔係咁開心架！

幾時買樓呀？

雖然廣男已經成家立室，但每年拜年，啲姨媽姑姐例牌問廣男「番緊咩工呀？」、「幾錢一個月呀？」、「幾時買樓呀？」或者「幾時生多個呀？」等等，其實廣男唔係想謝絕呢啲uncle、auntie嘅關心，但係每一個問題，其實都係一個「伏」，預着啲眼角高嘅親戚，你同佢講幾錢人工或者未買到樓，即係畀個機會佢哋教訓你一番；又或者預著啲好鍾意小朋友嘅親戚，又會追問你做咩唔生多個？廣男成日心諗，而家咁嘅環境仲要再生，你幫我養咩 … ？

不過，廣男呢啲Case都唔算係最worse，事關後生廣男一輩嘅年青人就更加慘。廣男有個表弟叫做Johnson（化名），佢大學畢業咗兩、三年，冇拍拖，當然亦都冇乜錢買樓啦，佢同廣男講如果可以避免，除咗啲最close嘅親戚之外佢盡量都會唔去拜年，因為佢實在頂唔順啲親戚「盤問」式嘅問題，感覺有啲「吃不消」咁！

後生仔冇拖拍？

有咩問題令佢覺得「吃不消」？除咗人工、買樓、升職同埋進修呢啲「基本問題」之外，佢覺得最難答嘅問題，就係畀人問佢做咩冇拍拖。有拍拖呢個概念嚟講，可以有幾個層次嘅，第一就係追唔追到女仔、第二就係有冇追女仔、第三就係有冇畀女仔追，Johnson就同廣男呻，「個個都冇拍拖，唔通個個都唔想拍拖咩？啲姨媽姑姐知唔知呢啲問題，好hurt人架嘛！」廣男明，廣男真係明，因為幾年以至更多年前，廣男面對嘅，又何嘗唔係呢個問題呢？

其實呢，農曆新年本來就係喜慶事情，啲姨媽姑姐關心下啲後生仔，好正常嘅，不過如果有啲問題觸碰到年青人嘅「內心深處」，就應該問得有技巧，「適可而止」喇，哈哈 … ！

圖片來源：新華網