每逢香港有大事發生，例如政制改革、選舉等，近年都「肯肯定」會見到違法佔領行動發起人、高教界選委戴耀廷嘅身影；Sorry，唔只係身影咁簡單，應該係話戴耀廷每次都行出嚟想主持大局先啱。仲有唔夠一個月就係特首選舉投票日，一向「政治癮」強烈嘅戴耀廷又有新搞作，今次就搞「特首民投」，叫市民投票然後建議非建制選委支持民望最高嘅候選人；不過今次「民投」好得意，竟然有埋「反對」、「棄權」選項，咁貼心嘅「民投」方案，係咪為某候選人度身訂造架？

支持票扣反對票 操控更容易

如果大家一向有留意開由民間搞嘅民意調查，都知道通常啲調查機構會問你最支持邊個，繼而得出邊個支持度最高、甚或值得投票嘅候選人。不過，今次由戴耀廷策劃嘅「民投」就相當「特別」，除咗「支持」選項之外，仲有「反對」同「棄權」選項，然後再以支持票減去反對票而得出嘅淨值，決定建議非建制選委支持邊個候選人，戴耀廷仲話希望有100萬人投票添。

如果講支持票或者支持度，暫時曾俊華應該係最高嘅，而林鄭月娥就緊隨其後，未來半個月林鄭月娥都仲有機會及時趕上；但如果用「新玩法」要扣反對票以得出支持票淨值，廣男覺得基本上有九成機會都係曾俊華跑出架喇，就算林鄭月娥到時支持度同曾俊華差唔多高，班非建制派即時「吹雞」叫人反對林鄭月娥啦！參考立法會選舉時嘅雷動計劃，用非建制派嘅基本盤嚟谷起個反對票，分分鐘變負數添！戴耀廷咁計法，會唔會有假借民意之嫌呢？等啲非建制選委可以明正言順咁投票畀曾俊華，廣男唔敢話一定係，但表面睇戴耀廷咁樣「度身訂造」投票，似係想搭棚畀曾俊華「上位」囉！

戴耀廷借「民投」挺曾？

廣男咁樣講，絕對唔係憑空猜測架，戴耀廷前兩日喺「生果報」有篇專欄文章，題目係《特首選戰取決林鄭走了多少票》，裡面「理性分析」如果林鄭月娥「走票」喺第一輪投票當中唔能夠勝出，到咗第二輪投票就對曾俊華相當有利，因為提名林鄭而最後「走票」嘅選委，都傾向投票畀曾俊華咁話。一睇呢篇文，再睇下戴耀廷個「民投」設計，即刻明晒！諗咁多嘢「鋪排」好個「民投」，如果話戴耀廷唔係想幫曾俊華鋪橋搭路，真係比較難令人相信。

只為造王 懶理8.31？

戴耀廷佢哋諗出咁「度身訂造」嘅「特首民投」，其實一啲都唔出奇，因為佢哋如果唔「花啲心思」，點樣支持喺政改、8.31框架以及23條立法等問題上立場同佢哋南轅北轍嘅曾俊華呢？不過講開又好奇怪，當初戴耀廷搞「違法佔領行動」都係想反8.31框架，而家好似想支持唔反對8.31框架嘅曾俊華，想點呀？